Alan Shearer kritikon Chelsean për ofertën ndaj Granit Xhakës: Është turp dhe qesharake

Legjenda e futbollit anglez e cilësoi të papranueshme ofertën prej 8 milionë funtesh për mesfushorin shqiptar, duke kujtuar se Sunderland pagoi 17 milionë funte për transferimin e tij vetëm një vit më parë.

Legjenda e futbollit anglez, Alan Shearer, ka reaguar ashpër ndaj ofertës së Chelsea FC për transferimin e mesfushorit shqiptar Granit Xhaka, transmeton albinfo.ch.

Në një prononcim për The Metro, Shearer e cilësoi të papranueshme ofertën prej 8 milionë funtesh, duke theksuar se Sunderland AFC kishte paguar 17 milionë funte për Xhakën vetëm një vit më parë.

“Sunderland e bleu Granit Xhakën për 17 milionë funte dhe ai ishte një nga lojtarët më të mirë në Premier League sezonin e kaluar. Ai nuk ishte vetëm një nga më të mirët te Sunderland, por në gjithë kampionatin”, u shpreh Shearer.

Ai shtoi se nuk ka logjikë që Chelsea të tentojë ta transferojë lojtarin për më pak se gjysmën e shumës së paguar nga Sunderland.

“Për mua kjo është e pakuptimtë. E kuptoj që lojtari mund të dëshirojë largimin dhe se agjenti i tij ka biseduar me Chelsean, por kjo është një ofertë mjaft turpëruese”, deklaroi ish-sulmuesi anglez.

Në fund, Shearer theksoi se Sunderland nuk ka asnjë arsye ta shesë një prej futbollistëve më të mirë të sezonit për një shumë kaq të ulët.

“Është turp për Chelsean. Është e qartë se nuk do ta marrin për atë shumë. Pse do ta shiste Sunderland një lojtar për më pak se gjysmën e çmimit që pagoi për të? Është thjesht qesharake”, përfundoi ai. /Albinfo.ch

---