Afrim Gashi ngrit shqetësimin për largimin masiv të shqiptarëve

Gjatë fjalës së tij ai theksoi se është shumë rëndësishme që shteti të krijojë kushte të mira që qytetarët të jetojnë dinjitetshëm

Kryetari i Kuvendit të Maqedonisë së Veriut, Afrim Gashi i është bashkuar Samitit të IV të Diasporës.

Gjatë fjalës së tij ai theksoi se është shumë rëndësishme që shteti të krijojë kushte të mira që qytetarët të jetojnë dinjitetshëm.

Ai gjithashtu ngriti shqetësimin për largimin masiv të shqiptarëve, duke nënvizuar se duhen marrë masa për të parandaluar ikjen e të rinjve, transmeton albinfo.ch.

“Arsyet që kanë sjellë deri te mërgimi kanë qenë të ndryshme dhe pa i kuptuar mirë arsyet nuk mund të arrijmë të konkluzioni se si mund ta bëjmë rilidhjen dhe rikthimin e qytetarëve që jetojnë jashtë Atdheut. Shpërngulja në Shqipëri nis në vitet ’90 për arsye ekonomike, në Kosovë për arsye politike dhe në Maqedoninë e Veriut për arsye ekonomike dhe politike. Kjo gjakderdhje demografike që po na ndodh gjatë viteve të fundit, duhet të marrë një zgjidhje. Pra duhet të ndërtojmë politika që ndalojnë largimin e të rinjve”, tha ai.

Gjithashtu Gashi bëri edhe një apel për politikën, që të bashkëpunojnë për të krijuar më shumë mundësi ekonomike, dhe të punojnë për një të ardhme të sigurt për qytetarët.

---