AAK-ja e bindur që po rritet si parti

Aleanca për Ardhmërinë e Kosovës është e bindur që në zgjedhjet e jashtëzakonshme që priten të mbahen brenda këtij viti do të shënoj rritje.

“Në bazë të hulumtime të fundit të  opinionit publik, rezulton se sikur zgjedhjet të mbaheshin sot, Aleanca për Ardhmërinë e Kosovës, do të fitonte mbi 22 përqind të votave, duke u renditur kështu si Partia me gjasa reale për të fituar zgjedhjet”, shkruhet në njoftimin për media të AAK-së.

Sipas njoftimit të kësaj partie 58.6 përqind e respondentëve janë deklaruar të kënaqur me punën e kryeministrit Haradinaj.

“Trendi i rritjes së Aleancës për Ardhmërinë e Kosovës, krahasuar me sondazhin paraprak të kryer në Prill të këtij viti, është mbi 4%, ndërkohë që ky trend vazhdon të jetë në ngritje të vazhdueshme. Duke mos dashur ta zhvlerësojmë këtë sondazh, hulumtimet tona të brendshme, e nxjerrin Aleancën edhe më mirë dhe fituese të pakontestueshme të zgjedhjeve”.

“Kjo klimë dhe mbështetje e krijuar për AAK-në dhe Liderin e saj Ramush Haradinaj, është rezultat i përpjekjeve të përbashkëta dhe vendosëmërisë e kursit të qartë, se interesat e shtetit dhe të qytetarit të tij, janë mbi krejt interesat politike e partiake të ditës. 100% KOSOVA”, përfundon komunikata e AAK-së, përcjell Albinfo.