“7 vëllezër e 7 motra”, vjen në Cyrih

Gazetarja zvicerane, Elisabeth Kaestli, ka promovuar librin e saj “7 vëllezër e 7 motra” para dashamirëve të fjalës së shkruar që ishin mbledhur të dielën në Qendrën Kulturore të Kosovës në Cyrih. Ushtruesja e detyrës së drejtoreshësh së Qendrës Kulturore të Kosovës, Shukrije Ramadani, ka thënë se pikërisht këtu është vendi për të gjithë artdashësit […]

Gazetarja zvicerane, Elisabeth Kaestli, ka promovuar librin e saj “7 vëllezër e 7 motra” para dashamirëve të fjalës së shkruar që ishin mbledhur të dielën në Qendrën Kulturore të Kosovës në Cyrih.

Ushtruesja e detyrës së drejtoreshësh së Qendrës Kulturore të Kosovës, Shukrije Ramadani, ka thënë se pikërisht këtu është vendi për të gjithë artdashësit dhe për aktivitete të tjera kulturore.

„Jemi këtu që të bisedojmë edhe për librin, edhe për problemet e tjera, sepse çdo bashkëbisedim e zvogëlon problemin dhe e bën më të lehtë”, tha në hapje të përurimit zonja Ramadani.

„Falënderoj znj. Elizabeth Kaestli, e cila si gazetare dhe publiciste deri më tash shkruar dy libra për Kosovën. Ky libër këtu flet për një familje të madhe nga Kosova. Jam këtu që të bisedojmë për këtë libër dhe për të gjitha temat e tjera që lidhen me fatin tonë”, tha konsulli i Republikës së Kosovës në Cyrih, Salih Sefa, që ishte i pranishëm në përurim.

Kurse autorja e librit, Elizabeth Kaestli, tregoi se si i erdhi ideja për ta shkruar një libër të këtillë.

Tha të ishte inspiruar gjatë një vizite në Kaçanik, në familjen e madhe Leka, të cilët kishin ardhur të gjithë në pushim dhe fëmijët e tyre komunikonin në shumë gjuhë, sepse kishin mërguar në gjashtë vende të ndryshme të botës.

„Për mua kjo është një histori nga Kosova, ku unë duke u nisur nga një familje, mund të tregoja shumë gjëra që janë tipike për ju shqiptarët”, tha Kaestli.

Pjesë të shkëputura nga libri u lexuan në gjuhën shqipe dhe atë gjermane, dhe për ta bërë leximin më relaksues u lexuan edhe poezi nga poetët që ishin të pranishëm në promovim.

Pas mbarimit të leximit, në fund iu dha rasti që të pranishmit të mund të shkëmbejnë biseda dhe mendime rreth librit drejtpërdrejt me autoren.

Të interesuarit kishin rastin ta siguronin librin me një autogram të autores Elizabeth Kaestli.

Elisabeth Kaestli është gazetare dhe shkrimtare e lirë, e cila prej një kohe të gjatë u është përkushtuar shkrimeve mbi dhe për Kosovën.

Së fundi ajo ka botuar librin „7 vëllezër, 7 motra – një familje kosovare nëpër botë” (7 Brüder, 7 Schwestern –  eine kosovarische Familie in der Welt) që i kushtohet familjes Reka nga komuna e Kaçanikut. Një pjesë e kësaj familjeje është e vendosur prej kohësh në Zvicër.