Protestat kundër Qeverisë së kryeministrit Edi Rama po vazhdojnë edhe sot në Tiranë, ku studentë dhe të rinj janë mbledhur sërish para Ministrisë së Arsimit, përcjell albinfo.ch.
Grumbullimi i protestuesve ka nisur pas orës 14:00, ndërsa policia ka shtuar praninë në zonën përreth institucionit, duke vendosur forca të shumta dhe autobotë me ujë.
Në orët e para të tubimit, situata është raportuar e qetë, ndërsa autoritetet kanë mbajtur në gatishmëri forcat e rendit për të parandaluar incidente të mundshme.
Protesta e sotme vjen një ditë pas përplasjeve të dhunshme në kryeqytetin shqiptar, ku protestuesit dhe policia u përballën në disa zona të Tiranës.
Gjatë demonstratës së djeshme, policia përdori gaz lotsjellës dhe ujë me presion për shpërndarjen e protestuesve, ndërsa disa persona mbetën të lënduar.
Ndër rastet më të rënda ishte lëndimi në sy i një protestuesi 28-vjeçar nga Elbasani, për të cilin autoritetet kanë nisur hetimet.
Studentët dhe të rinjtë që marrin pjesë në protesta vazhdojnë të kërkojnë ndryshime politike dhe përmirësimin e kushteve në arsim, duke shprehur pakënaqësi edhe për gjendjen ekonomike dhe mënyrën e qeverisjes.
Protestuesit kanë paralajmëruar se nuk do të tërhiqen nga kërkesat e tyre, përfshirë dorëheqjen e kryeministrit Edi Rama dhe të qeverisë së tij.
Policia po mban nën vëzhgim situatën, ndërsa protestat po vazhdojnë në kryeqytetin shqiptar./Albinfo.ch
