Ligji për Specialen: LVV kërkon analizë juridike, Çitaku kërkon zotim për votim

Foto: Kuvendi i Kosoves

Lëvizja Vetëvendosje ka reaguar ndaj nismës së Partisë Demokratike të Kosovës për ndryshimin dhe plotësimin e Ligjit për Dhomat e Specializuara, duke kërkuar që fillimisht të pritet vendimi i Gjykatës Kushtetuese lidhur me çështjen e konstituimit të Kuvendit.

LVV ka bërë të ditur se propozimin e PDK-së do ta shqyrtojë nga aspekti juridik, përfshirë përputhshmërinë me legjislacionin në fuqi dhe ndikimin që ndryshimet eventuale mund të kenë në procedurat që po zhvillohen pranë Dhomave të Specializuara.

Sipas LVV-së, çështja duhet të trajtohet përmes një qasjeje institucionale dhe të koordinuar, duke marrë parasysh edhe procedurat e apelit dhe interesat e ekipeve të ndryshme të mbrojtjes në rastet e katër ish-krerëve të UÇK-së.

Ndërkohë, ndaj këtij qëndrimi ka reaguar nënkryetarja e PDK-së, Vlora Çitaku.

Çitaku ka deklaruar se PDK është e gatshme t’i tërheqë lëndët e saj nga Gjykata Kushtetuese nëse LVV jep zotim publik se do ta votojë Projektligjin e dorëzuar për ndryshimin dhe plotësimin e Ligjit për Dhomat e Specializuara.

“Nëse LVV zotohet publikisht se do ta votojë Projektligjin e dorëzuar sot për ndryshimin dhe plotësimin e Ligjit për Dhomat e Specializuara, do të marrë përsipër mbulimin e plotë të shpenzimeve të mbrojtjes dhe do ta trajtojë këtë proces me përgjegjësinë e duhur shtetërore, ne jemi të gatshëm t’i tërheqim lëndët nga Gjykata Kushtetuese qysh nesër”, ka deklaruar Çitaku.

Kështu, PDK po e lidh tërheqjen e lëndëve nga Kushtetuesja me një zotim publik të LVV-së për votimin e Projektligjit dhe mbulimin e shpenzimeve të mbrojtjes.

Në anën tjetër, LVV ka theksuar se para çdo veprimi duhet të vlerësohen implikimet juridike të nismës dhe efektet e mundshme në proceset gjyqësore që janë në zhvillim.

Debati mes dy partive zhvillohet në një kohë kur çështja e ndryshimit të kuadrit ligjor për Dhomat e Specializuara dhe procedurat gjyqësore ndaj ish-krerëve të UÇK-së mbetet në qendër të diskutimeve politike dhe institucionale.