Integrimi

Shqiptarët ftohen të votojnë kandidatët e tyre shqiptarë

Për 100 ulëset e parlamentit në këtë land kandidojnë edhe Januz Saliuka nga SPÖ dhe Drita Cacaj nga ÖVP. Ndërsa Edon Zejna kandidon për bezirkun 10 nga ÖVP

E shtunë, 10 Tetor 2015 - 20:55 Arben Gjinaj

Sot,  ditën e diel më 11 tetor, shtetasit austriakë më të drejtë vote do të përcaktojnë edhe fatin e tyre të udhëheqjes për mandatin e ardhshëm në landin e Vjenës. Këtë vit për 100 ulëset e deputetëve të parlamentit në këtë land  kandidojnë edhe shqiptarët: Januz Saliuka nga Partia Socialdemokrate e Austrisë (SPÖ) dhe Drita Cacaj nga Partia Popullore e Austrisë (ÖVP). Ndërsa Edon Zejna kandidon për bezirkun (qarkun) e 10-të po ashtu nga partia ÖVP.

Kandidatët shqiptarë kanë mbyllur fushatën e tyre dhe tani vetëm shpresojnë në votën e qytetarëve veçanerisht të popullatës shqiptare me të drejtë vote në këtë regjion.
 
Kandidati për deputet nga radhet e SPÖ-së , Januz Saliuka kërkon nga shqiptarët që të mobilizohen sa më shumë dhe të dalin për të votuar duke penguar ardhjen në pushtet të ultranacionlisteve FPÖ –së, të cilët hapur janë kundër migrimit dhe të  huajve e që në këto zgjedhje ka një ngritje të dukshme e të madhe.
“Disponimi i qytetarëve austriakë është shumë solidar ndaj refugjatëve por prapë se prapë pjesa tjetër ultranacionaliste ka përfituar nga kjo situatë. Kërkohet një mobilizim i gjithë qytetarëve që të pengohet ardhja e tyre në pushtet”, ka thënë Januz Saliuka për “albinfo”.
 
Sipas z. Saliuka të gjitha këto të mira që prej dekadave janë krijuar në Austri e veçanerisht në Vjenë janë si rezultat i punës sistematike të partisë SPÖ, prandaj nëse ultranacionalistet vijnë në pushtet, atëherë do të rrezikohet i tërë sistemi social austriak.
“Një votë më pak e shqiptarëve, është një votë më shumë për partinë kundërshtare dhe nëse vijnë ultranacionalistet në pushtet,  më të dëmtuarit mund të jenë vet shqiptarët”, ka thënë ai duke përmendur edhe deklaratën e kryetarit të partisë ultranacionaliste austriake se nëse partia e tij vjen në pushtet (në nivelin qendror), ndër gjërat e para që do të bëjë është tërheqja e njohjes së Pavarësisë së Kosovës.
Jonuz Saliuka është nga Gjakova por në Vjenë jeton që prej vitit 1985. Ai punon në bezikrun e 17 në një departament të integrimit dhe diversitetit ndërsa njihet si një aktivist i shquar i shoqërisë civile dhe i të drejtave të shqiptarëve në shtetin austriak. Vota për të është votë për përfaqësimin e të drejtave të shqiptarëve në Austri.
“Shqiptarët duhet të vetëdijësohen dhe të votojnë kandidatët e tyre që të mund të përfaqësohemi edhe ne ashtu sikur komunitetet tjera. Ka ardhur koha që të jemi prezent edhe në institucionet politike dhe të luftojmë për të drejtat tona”, thotë ai.
 
Në anën tjetër Drita Cacaj e cila vjen nga partia popullore austriake ÖVP, përveç se kandidon për deputete të parlamentit të Vjenës është edhe kandidate për zgjedhjet e zonës së bezirkut të 5-të. Ajo kërkon mbështetje dhe dalje masive të shqiptarëve në votim.
“Ne kërkojmë mobilizim të komunitetit shqipfolës që jetojnë në Austri që të dalin për të votuar sepse duke votuar mund të jemi edhe më të fortë si komunitet dhe pastaj kemi të drejtë të jemi edhe më kërkues si pjesë e barabartë e këtij vendi”, shprehet ajo për “albinfo.ch”.
Zonja Cacaj thotë se komuniteti shqiptarë në Vjenë është më shumë se 35 mijë, ndërsa gjysma e tyre kanë të drejtë vote, prandaj ata duhet të shfrytëzojnë këtë të drejtë për të votuar për të mirën e tyre. “ Nëse shqiptarët nuk votojnë, ne nuk mund të jemi të përfaqësuar si duhet askund. Duhet të shihen komunitetet tjera se si janë të mobilizuar, pse mos të jemi edhe ne shqiptarët”, potencon ajo.
Në partinë  e ÖVP-së zonja Cacaj është aktive në pesë vitet e fundit ndërsa po ashtu është edhe udhëheqëse e grave të ÖVP -së për dy bezirke të kryeqytetit.
Ajo premton se nëse fiton besimin e popullit atëherë ajo do të angazhohet më shumë për arsimin, edukimin, integrimin dhe familjen e komunitetit tonë.
 
Në ÖVP për bezikurn e 10-të kandidon edhe Edon Zejna. Në synimet e djaloshit 20 vjeçar janë tri çështje të cilat kanë të bëjnë drejtpërdrejt më komunitetin shqiptar dhe që ai premton se do t` i realizojë nëse shqiptarët do të ia besojnë votën.
“E para është që gjuhën shqipe ta bëjmë gjuhë zyrtare në institucionet shtetërore. E dyta është, integrimi i studentëve shqiptarë në sistemin e Austrisë. Ky asociacion duhet të përkrahet edhe nga landi i Vjenës dhe kështu të iu ndihmojmë studentëve që janë këtu por edhe atyre që dëshirojnë të vijnë për të studiuar. Një synim tjetër është të krijojmë një shesh me emër shqiptar, ashtu siç e kanë serbet në Favoriten”,  ka thënë Edoni gjatë një bisede për “albinfo”.ch.
Kujdes: Në krahun e majtë të tuajin duhet të përcaktohet me një X partia, ndërsa në cep të krahut të djathtë duhet ta shkruani emrin e kandidatit tuaj të preferuar!
 

 Të ngjashme

Përfiton pa të drejtë 10.000 euro nga “sociali”: 15 muaj burg me kusht për kosovarin

 Të tjera nga Integrimi

Një urë mes rrënjëve dhe integrimit, një shtëpi e përbashkët e besimit dhe kulturës

 E-Diaspora

 Jeta në Austri