Publikohet lista e Kosovës, ftohet edhe talenti i Bayernit, Erblin Osmani

Franco Foda ka publikuar listën për katër ndeshjet e Ligës së Kombeve, ndërsa për herë të parë me ekipin A është ftuar 17-vjeçari Erblin Osmani

Përzgjedhësi i Kosovës, Franco Foda, ka publikuar të premten listën e futbollistëve të ftuar për katër ndeshjet e para të edicionit të ri të Ligës së Kombeve, transmeton albinfo.ch

Në listë janë përfshirë edhe Edon Zhegrova dhe Milot Rashica, ndërsa mungon kapiteni i deritashëm, Amir Rrahmani. Sipas raportimeve, Rrahmani ka vendosur të largohet nga përfaqësuesja pas mosmarrëveshjeve me drejtuesit e Federatës së Futbollit të Kosovës.

Risi në listën e Fodës është edhe Erblin Osmani, talenti 17-vjeçar i akademisë së Bayern Munichut. Osmani ka qenë pjesë e përfaqësueseve të Gjermanisë U16 dhe U17, ndërsa ka vendosur të përfaqësojë Kosovën në nivelin A.

Një tjetër emër i ri është Dion Kacurri. 22-vjeçari ka luajtur për Zvicrën U21 dhe aktualisht është pjesë e Austria Lustenau në Austri.

Kosova do ta nisë edicionin e ri të Ligës së Kombeve më 24 shtator, kur në Prishtinë përballet me Irlandën.

Katër ndeshjet e para të Kosovës janë:

• 24 shtator: Kosovë – Irlandë, Prishtinë
• 27 shtator: Austri – Kosovë
• 1 tetor: Izrael – Kosovë, Debrecen, Hungari
• 4 tetor: Kosovë – Austri, “Fadil Vokrri”

Këto ndeshje i takojnë Grupit 3 të Ligës B të Ligës së Kombeve. Datat dhe çiftet e ndeshjeve konfirmohen edhe nga UEFA. /Albinfo.ch

 

---