Bedri Hamza për vdekjen e Flora Brovinës: Simbol i qëndresës dhe dashurisë për atdheun

Kryetari i Partisë Demokratike të Kosovës (PDK), Bedri Hamza, ka reaguar pas vdekjes së ish-deputetes së kësaj partie, Flora Brovina, përcjell albinfo.ch.

Përmes një postimi në Facebook, Hamza ka shprehur dhimbjen për ndarjen nga jeta të Brovinës, të cilën e ka përshkruar si një grua të fortë, mjeke, intelektuale dhe veprimtare që ia kushtoi jetën Kosovës dhe qytetarëve të saj.

“Sot na la Flora Brovina. Na la një grua e fortë, një nënë, mjeke, intelektuale dhe veprimtare që gjithë jetën ia kushtoi Kosovës dhe qytetarëve të saj”, ka shkruar Hamza.

Ai ka vlerësuar qëndrueshmërinë dhe përkushtimin e Brovinës, duke thënë se ajo nuk u përkul përballë vështirësive dhe se do të mbetet simbol i qëndresës dhe dashurisë për atdheun.

“Flora nuk u përkul kurrë para vështirësive. Ajo qëndroi me dinjitet, guxim dhe përkushtim deri në fund të jetës”, ka shkruar Hamza.

Kreu i PDK-së ka shprehur ngushëllime për familjen, miqtë dhe të gjithë ata që e njohën Brovinën, duke theksuar mirënjohjen për kontributin e saj.

“Fjalët janë të pakta për humbjen e saj. Prehu në paqe, Florë!”, ka shkruar Hamza.

Ai ka përfunduar mesazhin e tij me “respekt dhe mirënjohje të përjetshme” për Flora Brovinën./Albinfo.ch.