Kosova, përmes DEZA-s, e pranishme në panairin “Olma”

Në Kosovë trajnohen bujqit për përpunimin e mëtejmë të produkteve të tyre dhe për rritjen e qëndrueshmërisë së produkteve në fjalë. Në këtë mënyrë krijohen vende të reja pune për njerëzit si Gëzimja

Franchesco është një kultivues i kakaos në Honduras, Silverio mbjell fidane në Peru ndërsa Gëzimja 18 vjeçe punon në një kopsht me xhama në Kosovë. Ata kanë të përbashkët se puna e tyre financohet nga programet e DEZA-s zvicerane (Drejtoria për Zhvillim dhe Bashkëpunim) për reduktimin e varfërisë dhe urisë si dhe kontribuojnë në përmirësimin e  kualitetit të jetës së tyre.

Të gjitha këto janë ekspozuar edhe në panairin më të madh të bujqësisë në Zvicër, atë “Olma” që është hapur sot në St. Gallen, transmeton albinfo.ch. Të interesuarit kanë pasur mundësinë që të vizitojnë stendat përkatëse të Deza-s e të komunikojnë me përfaqësuesit e saj lidhur me punën që ajo bën në vendet e përmendura dhe gjetiu.

Si në veri të Laosit, ashtu dhe në Honduras, në Kosovë ose në Kaukazin jugor, ata që duan t`i shesin prodhimet e tyre me një çmim të volitshëm, do të prodhojnë më tepër se që mund të konsumojnë familjet apo fshatrat e  tyre. Në këtë mënyrë ata do të sigurojnë ushqim rezervë edhe për kohët më të këqija. Por sfida është e vështirë. Qasja në tregje dhe investime është e domosdoshme prandaj dhe e vështirë për t`u realizuar.

Për këtë arsye Deza i mbështet bujqit për zhvillimin e kooperativave dhe strukturave më të mira të organizimit, ashtu që ata të mund të kenë qasje së paku në tregjet lokale. Si shembull, në Kosovë trajnohen bujqit për përpunimin e mëtejmë të produkteve të tyre dhe për rritjen e qëndrueshmërisë së produkteve në fjalë. Në këtë mënyrë krijohen vende të reja pune për njerëzit si Gëzimja, thuhet veç tjerash në prezantimin e bërë nga Deza.