Hyn në shërbim centrali më i madh agrivoltaik në Zvicër, në zonat rurale të Vaud-it

@Envato

Centrali më i madh agrivoltaik në Zvicër është ndërtuar në Lovatens (VD). Bëhet fjalë për kombinimin e paneleve diellore me prodhimin bujqësor në të njëjtën sipërfaqe. Kulturat e boronicave mbrohen nga kushtet atmosferike, ndërsa prodhohet energji elektrike e mjaftueshme për të furnizuar me energji rreth 1000 familje.

5,500 panelet fotovoltaike, të vendosura në një lartësi prej katër metrash, janë projektuar për t’iu përshtatur nevojave specifike të Olivier Pichonnat, fermer dhe kultivues i boronicave, raporton RTS. Panelet mundësojnë kalimin e makinerive të vjeljes, duke ofruar njëkohësisht mbrojtje nga kushtet e këqija atmosferike, si breshëri, si dhe nga ekspozimi i tepërt ndaj diellit, transmeton albinfo.ch.

Olivier Pichonnat është i kënaqur me këtë inovacion.

“Po kërkonim një zgjidhje mbrojtëse. Ky instalim ul temperaturën, gjë që rrjetat kundër breshrit apo plastika nuk e bëjnë. Këtë verë, nën panelet diellore kemi pasur mesatarisht 5 deri në 6 gradë më pak”, shpjegon ai.

Nga ana tjetër, uji i shiut mblidhet dhe drejtohet te rrënjët e bimëve.

“Nën këtë instalim, vlerësojmë se kemi nevojë për 30 për qind më pak ujë”, thotë fermeri për emisionin La Matinale.

Një partneritet premtues energjetik

Energjia elektrike e prodhuar nga panelet diellore është në pronësi të Romande Energie, investitori kryesor i projektit. Çdo vit, ky central pritet të prodhojë energji të mjaftueshme për të mbuluar nevojat për energji elektrike të rreth 1,000 familjeve.

Ky projekt pilot kërkoi katër vite punë dhe pritje, veçanërisht për shkak të procedurave administrative të nevojshme për marrjen e autorizimeve. Megjithatë, projekti mund t’u hapë rrugën projekteve të tjera të ngjashme.

Insolight, kompania që qëndron pas këtij instalimi, ka njoftuar tashmë se planifikon projekte të tjera të ngjashme në kantonin Vaud.