Stuhi të fuqishme godasin Slloveninë, probleme në transport dhe furnizimin me energji

Foto ilustrim @unsplash

Një stuhi e fuqishme ka përfshirë gjatë ditës së sotme disa zona të Sllovenisë, duke shkaktuar reshje intensive, erëra të forta dhe aktivitet të theksuar të rrufeve.

Pasojat më të mëdha janë raportuar në pjesën qendrore të vendit. Erërat kanë rrëzuar pemë, duke dëmtuar infrastrukturën dhe shkaktuar ndërprerje të përkohshme të energjisë elektrike në disa zona.

Probleme janë shfaqur edhe në transportin hekurudhor. Rënia e pemëve mbi linjën hekurudhore ka ndërprerë qarkullimin e trenave në relacionin mes Litijës dhe Trbovljës.

Për të mundësuar vazhdimin e udhëtimit, Hekurudhat Sllovene kanë organizuar transport alternativ me autobusë në të dyja drejtimet, me ndalesa pranë stacioneve në Litija, Sava, Zagorje dhe Trbovlje. Autoritetet kanë paralajmëruar udhëtarët se gjatë këtij organizimi mund të ketë vonesa.

Ndërkohë, ekipet e shpërndarjes së energjisë elektrike kanë ndërhyrë në terren dhe kanë rikthyer pjesën më të madhe të furnizimit. Punimet po vazhdojnë në zonat ku ende nuk është normalizuar plotësisht gjendja.

Shërbimet meteorologjike sllovene kanë paralajmëruar mundësinë e formimit të stuhive të tjera lokale në pjesën qendrore të vendit. Krahas reshjeve të dendura dhe erërave të forta, autoritetet kanë ngritur shqetësimin për rritje të shpejtë të nivelit të përrenjve dhe lumenjve të vegjël, si dhe për mundësi të përmbytjeve lokale.

Autoritetet u bëjnë thirrje qytetarëve të tregojnë kujdes, veçanërisht në zonat ku priten reshje të mëtejshme dhe erëra të forta.