Ndryshim i madh i motit në Zvicër, nga 33 gradë në 22 brenda pak ditësh

E marta sjell temperaturat e fundit të larta të kësaj periudhe, ndërsa nga mbrëmja priten stuhi, reshje dhe breshër. Deri të shtunën, temperaturat maksimale do të zbresin në rreth 22 gradë, ndërsa fundjava pritet kryesisht me diell.

Temperaturat në ultësirat zvicerane do të ngjiten të martën deri në 32 gradë Celsius, ndërsa në Bazel mund të arrijnë deri në 33 gradë. Edhe në Chur, Cyrih, Lucern, Valais dhe Zvicrën frankofone priten temperatura rreth 31 deri në 32 gradë, transmeton albinfo.ch.

Megjithëse nga pikëpamja meteorologjike vjeshta ka filluar tashmë, temperaturat e së martës do të jenë ende tipike për verën. Në disa zona mund të ketë edhe një natë tropikale, me temperatura që nuk zbresin nën 20 gradë gjatë natës.

 

Stuhi dhe breshër gjatë natës

Ndryshimi i motit do të nisë që nga pasditja. Mbi zonat malore do të formohen vranësira, prej të cilave mund të zhvillohen reshje dhe stuhi.

Gjatë mbrëmjes dhe sidomos gjatë natës mes së martës dhe së mërkurës, stuhitë do të përhapen edhe në ultësira. Meteorologët paralajmërojnë stuhi të fuqishme, erëra të forta dhe, veçanërisht në veri të Alpeve, edhe breshër.

 

E mërkura sjell reshje dhe temperatura më të ulëta

Të mërkurën moti do të jetë i ndryshueshëm, me vranësira të dendura dhe reshje, disa prej të cilave mund të shoqërohen me bubullima. Reshjet më të theksuara priten në zonat para-Alpine dhe në Alpet lindore.

Gjatë pasdites pritet një përmirësim i motit në rajonin e Bernës dhe në Zvicrën veriperëndimore, ku vranësirat do të shpërndahen gradualisht dhe moti do të mbetet i thatë.

 

Temperaturat do të bien ndjeshëm, nga rreth 17 gradë në mëngjes në rreth 19 gradë gjatë pasdites.

Të enjten në mëngjes do të ketë ende vranësira në disa pjesë të ultësirave, ndërsa përgjatë Alpeve moti do të jetë kryesisht i vranët dhe në Alpet lindore mund të ketë ende reshje.

Gjatë pasdites, ultësirat do të kenë më shumë intervale me diell. Temperaturat do të lëvizin nga rreth 10 gradë në mëngjes në 17 deri në 22 gradë gjatë pasdites. Në Rrafshin Zviceran do të fryjë herë pas here një Bise mesatare.

Sipas parashikimit, deri të shtunën temperaturat maksimale do të zbresin në rreth 22 gradë, ndërsa fundjava pritet të jetë në pjesën më të madhe me diell./Albinfo.ch

---