Eksperti zviceran paralajmëron: Një në dy vera mund të jetë më e nxehtë se ajo e vitit 2026

Një klimatolog i ETH Zurich paralajmëron se temperaturat ekstreme të regjistruara këtë verë në Zvicër mund të mos jenë më përjashtim në të ardhmen, ndërsa qytetet duhet të përshtaten me kushtet e reja klimatike

Rreth një në dy vera në të ardhmen mund të jetë edhe më e nxehtë se vera e vitit 2026, sipas një klimatologu të ETH Zurich.

Eksperti paralajmëron se politikat aktuale globale për klimën po e çojnë Zvicrën drejt një të ardhmeje ku temperaturat e larta të regjistruara këtë vit mund të bëhen diçka e zakonshme dhe jo më një fenomen i jashtëzakonshëm, transmeton albinfo.ch.

Vera e vitit 2026 ka lënë pasoja të dukshme në shumë pjesë të vendit. Në Bazel dhe Sion janë regjistruar më shumë se 50 ditë me temperatura prej të paktën 30 gradë Celsius.

Nxehtësia dhe mungesa e reshjeve kanë tharë tokën, ndërsa ndikimi është vërejtur edhe në Alpe. Akullnajat humbën mbulesën e borës edhe në lartësi mbi 4,000 metra.

Pasojat e temperaturave ekstreme nuk kufizohen vetëm te mjedisi. Vlerësohet se disa qindra vdekje shtesë në Zvicër gjatë kësaj vere kanë qenë të lidhura me nxehtësinë.

Në nivel evropian, numri i vdekjeve shtesë që lidhen me temperaturat e larta gjatë verës vlerësohet në rreth 35 mijë.

Klimatologu u bën thirrje qyteteve zvicerane që të ndryshojnë mënyrën se si planifikojnë dhe ndërtojnë infrastrukturën urbane.

Ndër masat që mund të ndihmojnë në përballimin e temperaturave gjithnjë e më të larta përmenden krijimi i më shumë hapësirave me hije, ventilimi gjatë natës dhe projektimi i ndërtesave në mënyrë që të përballojnë më mirë valët e të nxehtit.

Sipas ekspertit, planifikimi urban nuk duhet të bazohet më vetëm në kushtet klimatike të 50 viteve të fundit, por duhet të marrë parasysh se si mund të jetë klima e Zvicrës deri në vitin 2100.

---