Langstrasse e Cyrihut synon statusin e Trashëgimisë Botërore të UNESCO-s

Mbi 1,200 persona kanë nënshkruar një peticion që kërkon njohjen e Langstrasse si një trashëgimi botërore. Mbështetësit e nismës e cilësojnë zonën si një “përzierje unike sociale”.

Langstrasse, një nga zonat më të njohura dhe më karakteristike të Cyrihut, mund të synojë një status të veçantë ndërkombëtar, përcjell albinfo.ch. 

Deri tani, 1,201 persona kanë nënshkruar një peticion për t’i kërkuar UNESCO-s që ta njohë Langstrasse si pjesë të Trashëgimisë Botërore.

Nisma mbështetet edhe nga kryetari i qytetit të Cyrihut, Raphael Golta. Sipas mbështetësve, qëllimi është që UNESCO të njohë kulturën e veçantë të lagjes, jetën e saj të natës dhe karakterin shumëkulturor.

Langstrasse përshkruhet nga mbështetësit e peticionit si një “përzierje unike sociale”, ku ndërthuren kultura, komunitete dhe stile të ndryshme të jetesës.

Zona është veçanërisht e njohur për jetën e saj të natës, lokalet, restorantet dhe atmosferën e gjallë që e ka bërë një nga pjesët më të dallueshme të Cyrihut.

Megjithatë, Langstrasse ka edhe një tjetër reputacion. Zona është prej kohësh e lidhur me probleme të ndryshme sociale dhe kriminalitetin në qytet – një aspekt që, sipas kritikës së bërë ndaj nismës, nuk pritet të jetë pjesë e argumentimit për statusin e UNESCO-s.

Për momentin, peticioni ka mbledhur 1,201 nënshkrime, ndërsa mbetet për t’u parë nëse kjo nismë do të avancojë drejt një kandidature zyrtare për Trashëgiminë Botërore./Albinfo.ch. 

---