Kuvendi vazhdon seancën konstitutive më 9 shtator

Avni Dehari ka thirrur zyrtarisht vazhdimin e seancës konstitutive të Kuvendit të Kosovës, pas zhvillimeve të fundit politike dhe marrëveshjes së arritur ndërmjet Vetëvendosjes dhe LDK-së.

Kryesuesi i seancës konstitutive të Kuvendit, Avni Dehari, ka caktuar për 9 shtator, në orën 11:00, vazhdimin e seancës konstitutive, transmeton albinfo.ch.

Dehari ka bërë të ditur se vendimi për thirrjen e seancës vjen pas zhvillimeve të fundit politike dhe marrëveshjes së arritur ndërmjet Lëvizjes Vetëvendosje dhe Lidhjes Demokratike të Kosovës (LDK).

Përmes një postimi në Facebook, Dehari ka theksuar se deputetët duhet të tregojnë përgjegjësi për përmbushjen e detyrimeve të tyre kushtetuese.

“Deri atëherë pres që kjo marrëveshje të shoqërohet me përgjegjësi konkrete dhe me gatishmëri të deputetëve për t’i përmbushur detyrimet e tyre kushtetuese. Kosova nuk ka nevojë për një tjetër zvarritje, as për një tjetër krizë dhe aq më pak për një proces të ri zgjedhor”, ka shkruar Dehari.

Vazhdimi i seancës pritet të jetë në fokus të zhvillimeve politike, ndërsa deputetët do të përballen me përgjegjësinë për funksionalizimin e institucioneve të reja të vendit./Albinfo.ch

---