Shaqiri gjithnjë e më shpesh si “Joker” te Baseli

Xherdan Shaqiri po e nis më shpesh ndeshjen nga banka rezervë, por kur futet në fushë vazhdon të jetë vendimtar për FC Basel

Siç ka shkruar dje platforma albinfo.ch, Xherdan Shaqiri po përballet me një rol disi më ndryshe te FC Basel në fillimin e këtij sezoni.

Futbollisti me origjinë nga Kosova, i cili iu rikthye Baselit në sezonin 2024/25, tashmë po paraqitet më shpesh si “Joker”, duke e nisur ndeshjen nga banka rezervë. Në ndeshjet e para të sezonit, Shaqiri ishte titullar vetëm në dy raste, ndërsa në tri takime e nisi sfidën në stol.

Ndryshimi i rolit vjen në një periudhë kur trajneri i Baselit, Stephan Lichtsteiner, ka bërë disa përshtatje në sistemin e lojës. Kjo ka ngritur pikëpyetjen nëse ndryshimi taktik është arsyeja kryesore që kapiteni i Baselit po përdoret më shpesh si alternativë gjatë ndeshjeve, transmeton tutje albinfo.ch.

Megjithatë, statistikat dhe ndikimi i tij në fushë tregojnë se Shaqiri vazhdon të jetë një futbollist që mund ta ndryshojë rrjedhën e një ndeshjeje.

Në sezonin e tij të parë pas rikthimit në Basel, Shaqiri ishte i përfshirë në 39 gola në 34 ndeshje, ndërsa në sezonin pasues regjistroi 21 kontribute direkte në gola në 34 paraqitje, shkruan srf.

Edhe kur nuk e nis ndeshjen nga minuta e parë, 34-vjeçari vazhdon të ketë ndikim. Në barazimin 3:3 ndaj Young Boys, Shaqiri hyri në lojë në minutën e 33-të dhe trajneri Lichtsteiner e vlerësoi ndikimin e tij, duke theksuar se pas inkuadrimit të tij loja e Baselit ndryshoi pozitivisht.

Kjo e bën edhe më interesante pyetjen: A po bëhet Shaqiri “Jokeri” i ri i Baselit?

Pavarësisht rolit të ndryshuar, cilësitë dhe përvoja e tij mbeten të rëndësishme për ekipin. Shaqiri vazhdon të jetë një prej lojtarëve më të rrezikshëm të Baselit dhe, siç ka treguar edhe në ndeshjet e fundit, mund të bëjë diferencën edhe kur futet nga banka.

Në fund, mbetet për t’u parë nëse roli i tij si “Joker” do të jetë vetëm një zgjidhje e përkohshme e Lichtsteinerit apo një pjesë e planit taktik për pjesën tjetër të sezonit./Albinfo.ch

---