Nga sot hyjnë në fuqi ndryshime të reja ligjore në Zvicër

Nga mbrojtja e të dhënave dhe pagat në Basel, te organizimi i Prokurorisë së Përgjithshme dhe rregullat e reja evropiane për sigurinë kibernetike – disa ndryshime të rëndësishme ligjore hyjnë në fuqi gjatë shtatorit.

Nga 1 shtatori 2026, në Zvicër hyjnë në fuqi një sërë ndryshimesh ligjore dhe administrative që prekin fusha të ndryshme, nga mbrojtja e të dhënave dhe pagat e punonjësve publikë deri te lufta kundër krimit kibernetik, transmeton albinfo.ch.

Ndryshime në mbrojtjen e të dhënave në Bernë

Në kantonin e Bernës hyn në fuqi ligji i rishikuar kantonal për mbrojtjen e të dhënave.

Me ndryshimet e reja, më shumë se 1.000 komuna dhe institucione të së drejtës komunale do t’i nënshtrohen drejtpërdrejt mbikëqyrjes së autoritetit kantonal për mbrojtjen e të dhënave.

Katër komunat më të mëdha – Berna, Biel/Bienne, Köniz dhe Thun – do të vazhdojnë të kenë zyrat e tyre për mbrojtjen e të dhënave.

Rritje pagash për administratën publike në Basel

Në Basel-Qytet, nga 1 shtatori zbatohet në masë të madhe paketa e masave për pagat e punonjësve të shërbimit publik, e miratuar nga parlamenti kantonal.

Paketa përfshin kryesisht rritjen e pagave fillestare, masa të veçanta për pjesëtarët e policisë kantonale dhe rritjen e disa kompensimeve financiare.

Ndryshimi i kompensimit për koston e jetesës për të gjitha kategoritë e pagave do të hyjë në fuqi më 1 janar 2027.

Masat do t’i kushtojnë kantonit rreth 18 milionë franga në vit, ndërsa parashihet edhe një shpenzim i vetëm prej 4,3 milionë frangash.

Prokuroria e Përgjithshme ndryshon strukturën

Edhe Prokuroria e Përgjithshme e Zvicrës (OAG) po modernizon strukturën e saj me rregulloret e reja për organizimin dhe administrimin, të cilat hyjnë në fuqi më 1 shtator.

Reforma prek strukturën, personelin dhe procedurat e institucionit. Një nga synimet kryesore është menaxhimi më efikas i rasteve dhe specializimi më i madh në fusha moderne të kriminalitetit, veçanërisht në krimin kibernetik dhe veprat penale që lidhen me kriptovalutat.

Rregulla të reja evropiane për sigurinë kibernetike

Një tjetër ndryshim me rëndësi për kompanitë zvicerane vjen nga Bashkimi Evropian.

Nga 11 shtatori, hyjnë në fuqi pjesë të Aktit të BE-së për Reziliencën Kibernetike (Cyber Resilience Act – CRA). Kërkesat e para të detyrueshme lidhen me menaxhimin e dobësive të sigurisë dhe detyrimin për raportimin brenda 24 orëve të incidenteve të caktuara të sigurisë.

Këto rregulla do të prekin edhe prodhuesit dhe shitësit zviceranë që ofrojnë në tregun e BE-së produkte me elemente digjitale, përfshirë softuerë dhe pajisje të lidhura me internetin.

Kompanitë që nuk i përmbushin kërkesat mund të përballen me gjoba të larta ose përjashtim nga tregu i BE-së.

Ndërkohë, qeveria zvicerane i ka ngarkuar Zyrës Federale për Sigurinë Kibernetike përgatitjen e një dokumenti për konsultim deri në vjeshtën e vitit 2026, me synimin për të krijuar edhe në Zvicër një kuadër ligjor për qëndrueshmërinë kibernetike të produkteve digjitale.

Ndryshimet synojnë që, në të ardhmen, të përcaktohen më qartë kërkesat e sigurisë kibernetike për zhvillimin dhe vendosjen në treg të produkteve që përmbajnë elemente digjitale. /Albinfo.ch

---