Karburantet shtrenjtohen në Zvicër: Benzina mbi 2 franga, nafta arrin në 2.30 për litër

(KEYSTONE/Urs Flueeler).

Çmimet e karburanteve në Zvicër po vazhdojnë të shënojnë luhatje të ndjeshme, ndërsa në periudha të caktuara ato mund të ndryshojnë edhe brenda pak ditësh.

Sipas të dhënave të Touring Club Suisse (TCS), një litër benzinë pa plumb 95 kushton 2.02 franga, ndërsa për benzinën pa plumb 98 çmimi është 2.13 franga për litër. Më shtrenjtë aktualisht është nafta (Diesel), me 2.30 franga për litër.

TCS bën të ditur se çmimet e benzinës dhe naftës në Zvicër përditësohen vazhdimisht, për shkak të ndryshimeve të shpeshta në treg.

Në formimin e çmimit përfundimtar të karburanteve ndikojnë disa faktorë, përfshirë zhvillimet në tregjet ndërkombëtare të naftës, kursin e këmbimit, kostot e transportit dhe përpunimit, si dhe taksat dhe detyrimet në Zvicër.

Për këtë arsye, ndryshimet në tregjet ndërkombëtare mund të reflektohen edhe në çmimet që shoferët paguajnë në pikat e karburantit në Zvicër.

Diferencat e çmimeve mund të jenë të konsiderueshme edhe ndërmjet pikave të ndryshme të furnizimit, ndaj drejtuesve të automjeteve u rekomandohet të krahasojnë çmimet para se të furnizohen.

Çmimet sipas të dhënave të TCS:

• Benzinë pa plumb 95: 2.02 CHF/litër
• Benzinë pa plumb 98: 2.13 CHF/litër
• Naftë (Diesel): 2.30CHF/litër