Ambasadorët dhe bizneset diskutojnë mundësitë për investime dhe bashkëpunim ekonomik

Forumi Business to Ambassador (B2A), i zhvilluar në kuadër të Konferencës së IX të Ambasadorëve, mblodhi përfaqësues të diplomacisë dhe sektorëve kryesorë të ekonomisë së Kosovës.

Në përmbyllje të sesioneve të ditës së dytë të Konferencës së IX të Ambasadorëve, Forumi Business to Ambassador (B2A) shërbeu si një platformë për bashkëbisedim, rrjetëzim dhe forcimin e bashkëpunimit ndërmjet shefave të misioneve diplomatike të Republikës së Kosovës dhe përfaqësuesve të sektorit privat, transmeton albinfo.ch.

 

Në forum u përfaqësuan disa prej sektorëve kryesorë të ekonomisë së vendit, përfshirë energjinë, teknologjinë e informacionit dhe komunikimit (ICT), industrinë e drurit dhe prodhimin, agro-përpunimin, industritë kreative dhe filmin, si dhe turizmin.

Gjatë diskutimeve u trajtuan mundësitë për rritjen e bashkëpunimit ekonomik dhe krijimin e urave të reja ndërmjet bizneseve kosovare dhe tregjeve ndërkombëtare.

 

Një vëmendje e veçantë iu kushtua edhe tërheqjes së investimeve të huaja, promovimit të potencialit ekonomik të Kosovës dhe prezantimit të produkteve vendore në tregjet ndërkombëtare.

Forumi B2A synon që përmes bashkëpunimit ndërmjet diplomacisë dhe sektorit privat të krijojë mundësi të reja për bizneset kosovare, duke shfrytëzuar rrjetin diplomatik të Kosovës për promovimin e ekonomisë, produkteve dhe potencialeve të vendit jashtë kufijve./Albinfo.ch

 

---