Përplasje mes dy tramvajesh në Gjermani, rreth 25 të lënduar, 3 prej tyre në rrezik për jetën

Keystone (Matthias Balk/dpa via AP)

Një aksident i rëndë ka ndodhur në qytetin Gelsenkirchen të Gjermanisë, ku dy tramvaje janë përplasur me njëri-tjetrin, duke lënë të plagosur rreth 25 persona.

Sipas të dhënave të para nga autoritetet, njëri prej tramvajeve kishte ndaluar në një pjesë të hapur të linjës, ndërsa më pas është goditur nga një tjetër tramvaj që transportonte pasagjerë.

Nga përplasja, shtatë persona kanë pësuar lëndime të rënda, ndërsa tre të tjerë ndodhen në gjendje kritike dhe mjekët nuk e kanë përjashtuar rrezikun për jetën e tyre. Ekipet emergjente u kanë dhënë ndihmën e parë të lënduarve në vendin e ngjarjes, para se ata të dërgoheshin në spitalet përreth.

Ende nuk dihen shkaqet që çuan në këtë përplasje. Policia ka nisur hetimet për të zbardhur rrethanat e aksidentit dhe për të kuptuar arsyen pse tramvaji i parë kishte mbetur i ndalur në itinerar.

Si pasojë e aksidentit, një pjesë e bulevardit Kurt-Schumacher u mbyll përkohësisht për qarkullim, duke shkaktuar pengesa në trafik. Më vonë, qarkullimi u lejua pjesërisht në njërën prej korsive.

Në operacionin e shpëtimit morën pjesë dhjetëra ekipe emergjente, ambulanca dhe psikologë, të cilët ofruan mbështetje për pasagjerët dhe personat e prekur nga ngjarja.

Kryebashkiakja e Gelsenkirchenit, Andrea Henze, e përshkroi aksidentin si një ngjarje “jashtëzakonisht tronditëse”, pasi pa nga afër pasojat e përplasjes brenda njërit prej tramvajeve.