Alarm në Gjermani, dron me eksploziv zbulohet në Aeroportin e Leipzigut

Autoritetet gjermane kanë nisur hetime për terrorizëm, ndërsa një avion mallrash i DHL-it u përplas me një objekt të paidentifikuar gjatë incidentit.

Një dron i pajisur me një mjet shpërthyes është zbuluar pranë pistës jugore të Aeroportit Leipzig/Halle në Gjermani, duke shkaktuar një alarm të madh sigurie dhe ndërprerje të përkohshme të trafikut ajror, shkruan BBC,  përcjell albinfo.ch.

Sipas autoriteteve gjermane, droni u zbulua nga një punonjës i aeroportit, ndërsa ekspertët për çmontimin e mjeteve shpërthyese neutralizuan detonatorin me ndihmën e një roboti të specializuar. Për arsye sigurie, pista jugore u mbyll, ndërsa disa fluturime u devijuan.

Gjatë incidentit, një avion mallrash i kompanisë DHL, i cili kishte ndërprerë uljen për shkak të situatës në aeroport, u përplas në ajër me një objekt të paidentifikuar dhe më pas u ul në mënyrë të sigurt në Hanover. Avioni pësoi vetëm dëmtime të lehta dhe nuk pati të lënduar.

Prokuroria në Dresden dhe njësitë gjermane kundër terrorizmit kanë marrë përsipër hetimet. Deri tani nuk është konfirmuar përgjegjësia e ndonjë grupi apo shteti, ndërsa autoritetet po shqyrtojnë të gjitha pistat e mundshme.

Aeroporti Leipzig/Halle është një nga qendrat më të rëndësishme të transportit ajror të mallrave në Evropë dhe luan rol kyç në logjistikën e DHL dhe në operacionet e transportit për Ukrainën, çka e bën incidentin veçanërisht të ndjeshëm nga pikëpamja e sigurisë.

---