Një i vdekur dhe të paktën 15 të plagosur pasi një furgon hyri në turmë gjatë Paradës së Krenarisë në Berlin

Një person ka humbur jetën dhe të paktën 15 të tjerë janë plagosur pasi një furgon hyri mes turmës gjatë festimeve të Paradës së Krenarisë (Christopher Street Day) në Berlin, përcjell albinfo.ch.

Ngjarja ndodhi të shtunën në mbrëmje në parkun Tiergarten, pranë Portës së Brandenburgut, ku qindra mijëra persona ishin mbledhur për një nga paradat më të mëdha të komunitetit LGBTQ+ në Evropë. Sipas policisë, automjeti goditi disa persona para se të përfundonte përplasjen me një pemë.

Pas incidentit, organizatorët ndërprenë menjëherë paradën dhe koncertin përmbyllës, ndërsa policia u bëri thirrje pjesëmarrësve të largoheshin nga zona. Në vendngjarje u angazhuan një numër i madh ambulancash, zjarrfikësish dhe forcash policore.

Sipas informacioneve të deritanishme, disa nga të plagosurit ndodhen në gjendje të rëndë. Policia ka nisur një operacion të gjerë për identifikimin dhe kapjen e autorit ose autorëve, pasi drejtuesi i automjetit është larguar nga vendi i ngjarjes. Motivet e incidentit nuk janë bërë ende të ditura dhe hetimet janë në vazhdim.