OBSH bën thirrje për përgatitje ndaj valëve të të nxehtit

Keystone (AP Photo/Petros Giannakouris)

Nxehtësia ekstreme po shndërrohet në një nga sfidat më të mëdha për shëndetin publik, ndërsa ndryshimet klimatike po e përkeqësojnë këtë fenomen nga viti në vit. Organizata Botërore e Shëndetësisë (OBSH) paralajmëron se Evropa është rajoni që po ngrohet me ritmet më të shpejta në botë.

Sipas OBSH-së, të dhënat paraprake nga pesë vende evropiane tregojnë se temperaturat e larta kanë shkaktuar rreth 10 mijë vdekje shtesë vetëm gjatë kësaj vere, megjithëse bilanci i plotë ende nuk është përfundimtar.

Për të përballuar ndikimin e valëve të të nxehtit, Zyra Rajonale e OBSH-së për Evropën ka hartuar udhëzues dhe mjete praktike që synojnë forcimin e kapaciteteve të sistemeve shëndetësore. Këto përfshijnë rritjen e qëndrueshmërisë së spitaleve, përmirësimin e sistemeve të ftohjes dhe zbatimin e planeve të veprimit për mbrojtjen e shëndetit gjatë periudhave me temperatura ekstreme.

OBSH thekson se valët e të nxehtit mund të rrisin ndjeshëm numrin e pacientëve, duke vënë nën presion institucionet shëndetësore, ndërsa edhe personeli mjekësor përballet me rrezikun e stresit dhe lodhjes për shkak të temperaturave të larta.

Organizata mbështet vendet në identifikimin e rreziqeve që lidhen me nxehtësinë ekstreme, furnizimin me energji, sigurimin e ujit, funksionimin e sistemeve të ftohjes dhe mbrojtjen e pacientëve dhe stafit shëndetësor.

Po ashtu, planet e veprimit për mbrojtjen e shëndetit gjatë vapës ndihmojnë autoritetet kombëtare dhe lokale të koordinojnë masat parandaluese, komunikimin me qytetarët dhe reagimin në raste emergjente. OBSH ka publikuar edhe udhëzime të reja për hartimin dhe përmirësimin e këtyre planeve.

Drejtori Rajonal i OBSH-së për Evropën, Dr. Hans Henri P. Kluge, thekson se humbjet e jetëve nga temperaturat e larta mund të parandalohen. Sipas tij, mbrojtja e qytetarëve kërkon paralajmërim në kohë, akses në ujë dhe vende të freskëta, mbështetje për grupet më të rrezikuara dhe përgatitje të mirë të sistemeve shëndetësore.