Volkswagen drejt mbylljes së disa fabrikave në Gjermani? Rreth 40 mijë vende pune në rrezik

Volkswagen po përgatit një plan të gjerë ristrukturimi që mund të sjellë mbylljen e prodhimit në disa nga fabrikat e tij në Gjermani, duke vënë në rrezik rreth 40 mijë vende pune, raportojnë mediat gjermane, përcjell albinfo.ch.

Sipas revistës Der Spiegel, e cila i referohet burimeve nga bordi mbikëqyrës i kompanisë, drejtori ekzekutiv Oliver Blume synon të ndalojë prodhimin në fabrikat e Zwickau dhe Emden gjatë pesë viteve të ardhshme. Plani parashikon gjithashtu mbylljen e fabrikës së automjeteve komerciale në Hannover në vitin 2032, si dhe të fabrikës së Audi në Neckarsulm në vitin 2034.

Katër fabrikat e përfshira në plan punësojnë së bashku rreth 40 mijë punëtorë, ndërsa strategjia e re e grupit parashikon edhe shkurtimin e afro 50 mijë vendeve të punës në të gjithë kompaninë deri në vitin 2030.

Sipas analistëve, këto propozime përfaqësojnë një nga transformimet më të mëdha në historinë e prodhuesit gjerman të automjeteve. Plani pritet të diskutohet në mbledhjen e bordit mbikëqyrës në Wolfsburg.

Ndërkohë, sindikata e fuqishme gjermane IG Metall ka kundërshtuar ashpër projektin e ristrukturimit dhe ka bërë thirrje për protesta. Një tubim është paralajmëruar të mbahet në Wolfsburg, në të njëjtën ditë kur bordi do të shqyrtojë propozimet./Albinfo.ch