Provokim me flamurin serb ndaj Xhakës, kapiteni i Zvicrës u përgjigj me gol

Flamuri serb nuk e ndali Xhakën, realizoi penalltinë dhe çoi Zvicrën në çerekfinale

Kapiteni i Zvicrës, Granit Xhaka, tregoi edhe një herë karakterin e tij në momentet vendimtare, duke mos u ndikuar nga provokimet e tifozëve gjatë ndeshjes ndaj Kolumbisë në Kupën e Botës 2026, transmeton albinfo.ch.

Zvicra siguroi kualifikimin në çerekfinale pas fitores dramatike 4:3 në serinë e penalltive, ndërsa Xhaka realizoi me qetësi penalltinë e parë për “helvetikët”.

Sipas mediumit kroat 24sata, gjatë ekzekutimit të penalltive, në tribunën pas portës ku gjuanin futbollistët e Zvicrës u shpalos një flamur i Serbisë, mes tifozëve kolumbianë, në një përpjekje të dukshme për ta provokuar mesfushorin shqiptar.

Megjithatë, Xhaka nuk u shpërqendrua. Ai realizoi penalltinë në mënyrë perfekte, duke i dhënë tonin serisë që në fund e dërgoi Zvicrën në çerekfinale të Kupës së Botës.

Paraqitja e tij u vlerësua si një tjetër dëshmi e lidershipit dhe përqendrimit në momentet me presion të lartë, duke ndihmuar Zvicrën të vazhdojë rrugëtimin historik në turne./Albinfo.ch

---