Venezia arrin marrëveshje për transferimin e Albion Rrahmanit

Klubi italian do t’i paguajë 7.5 milionë euro Spartës së Pragës për sulmuesin kosovar, ndërsa marrëveshja përfshin edhe bonuse deri në 2 milionë euro.

Venezia FC ka arritur marrëveshje me AC Sparta Prague për transferimin e sulmuesit kosovar Albion Rrahmani, përcjell albinfo.ch.

Sipas raportimit të Football Italia, klubi italian do të paguajë 7.5 milionë euro për kartonin e 25-vjeçarit, ndërsa marrëveshja përfshin edhe deri në 2 milionë euro bonuse, në varësi të performancës dhe objektivave të arritura.

Rrahmani iu bashkua Spartës së Pragës në vitin 2024, pasi u transferua nga FC Rapid București për rreth 5 milionë euro.

Sulmuesi kosovar zhvilloi një sezon të suksesshëm me klubin çek, duke shënuar 16 gola dhe duke regjistruar katër asistime në 49 ndeshje gjatë edicionit 2025/26.

Kalimi te Venezia pritet të jetë një hap i rëndësishëm në karrierën e Rrahmanit, i cili do të provojë veten në futbollin italian. /Albinfo.ch

---