Bastisje e madhe në Federatën Gjermane të Futbollit pas eliminimit nga Kupa e Botës

(KEYSTONE/DPA/David Inderlied)

Policia ka ndërmarrë një bastisje të gjerë në zyrat e Federatës Gjermane të Futbollit (DFB), vetëm pak orë pas eliminimit të Gjermanisë nga Kupa e Botës.

Operacioni është zhvilluar të mërkurën në mëngjes dhe sipas raportimeve ka përfshirë mbi 150 efektivë policie, të cilët kanë kontrolluar ambientet e federatës në Frankfurt, si dhe disa institucione komunale në qytete të ndryshme të përfshira në organizimin e ndeshjeve të Euro 2024.

Hetimi lidhet me dyshime për përfitime të padrejta, ku zyrtarë publikë dyshohet se kanë marrë dhurata si bileta ndeshjesh, udhëtime dhe qëndrime në hotele nga organizatorët, gjë që mund të cilësohet si korrupsion.

Autoritetet po shqyrtojnë gjithashtu raste të dyshuara të shpërndarjes së biletave falas për ndeshje të rëndësishme të turneut, përfshirë gjysmëfinalen mes Spanjës dhe Francës në Euro 2024.

Në një deklaratë të përbashkët, policia dhe prokuroria kanë bërë të ditur se hetimet janë ende në fazë fillestare dhe fokusohen në identifikimin e përfitimeve të mundshme të paautorizuara dhe mënyrës së shpërndarjes së tyre.

Ndërkohë, autoritetet gjermane kanë theksuar se çdo përfitim i tillë për zyrtarët publikë është i papranueshëm dhe do të hetohet deri në fund.