Gjermani: Vdes dyvjeçari pasi ra nga dritarja e katit të katërt të banesës

Autoritetet gjermane po hetojnë rrethanat e aksidentit, pa indikacione për veprim të qëllimshëm

Një operacion shpëtimi dramatik është zhvilluar të hënën pasdite para një pallati apartamentesh në Wuppertal të Gjermanisë, pasi një fëmijë dyvjeçar ra nga dritarja e një banese në katet e sipërme, përcjell albinfo.ch.

Sipas raportimeve të mediave gjermane, përfshirë Bild, ngjarja ndodhi rreth orës 12:52 në një ndërtesë në rrugën Berliner Straße, një prej arterieve kryesore të qytetit.

Fëmija u transportua menjëherë në spital nga shërbimet e emergjencës, por fatkeqësisht ndërroi jetë pak më vonë si pasojë e plagëve të rënda.

Raportohet se rrethanat e aksidentit ende nuk janë plotësisht të qarta. Dyshohet se dritarja mund të ketë qenë e hapur për shkak të temperaturave të larta të verës, duke bërë të mundur rënien e fëmijës pa u vënë re.

Policia gjermane ka nisur hetimet për të sqaruar ngjarjen, ndërsa deri më tani nuk ka asnjë indikacion që të sugjerojë një veprim të qëllimshëm. /Albinfo.ch

---