Iniciativa për sigurinë ushqimore dështon, shoqata ngre padi për mungesë nënshkrimesh

Pixabay

Iniciativa për sigurinë ushqimore në Zvicër ka dështuar pasi nuk ka arritur numrin e kërkuar të nënshkrimeve.

Sipas një rinumërimi të urdhëruar nga Këshilli Federal, nga rreth 98,000 nënshkrime të certifikuara, 96,200 janë shpallur të vlefshme, duke mbetur nën pragun prej 100,000 nënshkrimesh të nevojshme për suksesin e iniciativës.

Shoqata që qëndron pas iniciativës ka shprehur mosbesim ndaj rezultateve dhe ka paraqitur një padi penale kundër personave të panjohur në Prokurorinë Federale. Sipas saj, nga informacionet e mbledhura në mbi 240 komuna, rezultojnë të paktën 5,000 nënshkrime të certifikuara që nuk figurojnë në shifrat përfundimtare.

Mospërputhje janë raportuar veçanërisht në kantonet Cyrih, Friburg, St. Gallen dhe Solothurn, ku komunat dyshohet se kanë regjistruar më shumë nënshkrime sesa janë dorëzuar në Kancelarinë Federale.

Shoqata për GMO-free food kërkon sqarim të plotë nga autoritetet dhe po shqyrton edhe ankimimin në Gjykatën Federale.

Nga ana e saj, Kancelaria Federale i ka hedhur poshtë akuzat për humbje të listave të nënshkrimeve, duke theksuar se komunat i dorëzojnë ato te organizatat e iniciativës, të cilat janë përgjegjëse për ruajtjen dhe dorëzimin e tyre. Vetëm nënshkrimet e dorëzuara zyrtarisht mund të numërohen në proces.