Bogujevci priti ekipin e filmit “Dua” pas suksesit në Cannes

Filmi kosovar vlerësohet si arritje e rëndësishme për kinemanë vendore dhe promovimin ndërkombëtar

Ministrja në detyrë e Kulturës, Rinisë dhe Sportit, Saranda Bogujevci, ka pritur ekipin e filmit “Dua” pas suksesit të arritur në Festivalin e Kanës, ku produksioni u nderua me çmimin “SACD” në kuadër të programit “Semaine de la Critique”, albinfo.ch. 

Gjatë takimit, Bogujevci ka përgëzuar regjisoren Blerta Basholli dhe ekipin realizues, duke e vlerësuar këtë arritje si një sukses të rëndësishëm për kinemanë e Kosovës dhe prezantimin e saj në skenën ndërkombëtare.

Në diskutim u trajtua edhe rrugëtimi i filmit, procesi i realizimit dhe përvoja në festival, me theks të veçantë në nevojën për mbështetje të vazhdueshme për industrinë e filmit në vend.

Sipas ministres, suksesi i “Dua” dëshmon nivelin e lartë artistik të filmbërësve kosovarë dhe rritjen e pranisë së kinemasë së Kosovës në festivalet më prestigjioze botërore./Albinfo.ch 

---