“Shpërblimi financiar” po bëhet trend në Zvicër për të gjetur banesë

Qiramarrësit po ofrojnë deri në mijëra franga për këdo që i ndihmon të sigurojnë një apartament

Kriza e banesave në qytetet e mëdha të Zvicrës po bëhet aq e fortë sa shumë persona tashmë po ofrojnë para për këdo që i ndihmon të gjejnë një apartament me qira.

Sipas raportimeve, gjithnjë e më shumë njerëz po publikojnë njoftime në rrjetet sociale dhe platformat online duke premtuar një “finder’s fee” – një shpërblim financiar për personin që arrin t’u sigurojë banesë pa procedurat e zakonshme dhe listat e gjata të pritjes, shkruan The Local, transmeton albinfo.ch.

Shumat ndryshojnë sipas qytetit dhe vështirësisë së tregut. Në Lucern, ku niveli i banesave të lira është nën 1%, disa kërkues ofrojnë deri në 1,000 franga zvicerane për ndihmë. Në Cyrih, shpërblimet për apartamente në lagje të preferuara arrijnë rreth 500 franga.

Sipas ekspertëve, kjo praktikë po krijon një “avantazh shtesë” për personat me më shumë para, në një treg që tashmë konsiderohet jashtëzakonisht konkurrues.

Megjithatë, sistemi nuk është i paligjshëm nëse pagesa ofrohet vullnetarisht. Juridikisht, ai trajtohet si pagesë për një shërbim të kryer, edhe pse kritikët thonë se praktikisht favorizon më të pasurit dhe e bën tregun e banesave edhe më të padrejtë.

Zvicra po përballet prej vitesh me mungesë të madhe apartamentesh, sidomos në qytetet si Cyrih, Gjenevë dhe Lozanë, ku qiratë dhe konkurrenca për banesa kanë arritur nivele rekord.

 

 

 

---