Kosova drejt miqësores me Andorrën, ndeshja pritet më 7 qershor në “Fadil Vokrri”

Keystone (AP Photo/Visar Kryeziu)

Kryetari i Federatës së Futbollit të Kosovës, Agim Ademi, ka konfirmuar se Andorra mund të jetë njëra prej kundërshtareve të Kosovës në ndeshjet miqësore të muajit qershor, përcjell albinfo.ch.?

Sipas Ademit, Kosova dhe Andorra pritet të përballen në mbrëmjen e 7 qershorit, në stadiumin “Fadil Vokrri” në Prishtinë. Edhe pse në Kosovë në këtë datë do të mbahen zgjedhjet e parakohshme parlamentare, kreu i FFK-së ka theksuar se kjo nuk do të ndikojë në zhvillimin e ndeshjes.

“Nuk e kemi plotësisht të konfirmuar, por jemi në kontakt me zyrtarë të Federatës së Futbollit të Andorrës. Besoj që mund të jetë njëra prej kundërshtareve në ndeshjet miqësore. Nuk ka nevojë të ndryshohet data nëse luajmë më 7 qershor, sepse i kemi të ndara datat e FIFA-s dhe nuk ka nevojë, sepse përfundojnë zgjedhjet kur të fillojë ndeshja”, ka deklaruar Ademi.

Ai ka bërë të ditur se FFK është në bisedime edhe me 5-6 përfaqësuese të tjera për një tjetër ndeshje miqësore, por nuk ka dhënë detaje për emrat e mundshëm. Sipas tij, gjithçka pritet të finalizohet të premten ose në fillim të javës së ardhshme.

“I kemi 5-6 kombëtare që i kemi përzgjedhur. Janë të interesuara që duan të bëjnë lojë miqësore, por ende nuk e kemi caktuar. Nesër ose më së largu të hënën do të zyrtarizohen”, ka shtuar ai.

Kosova në muajin mars ishte pranë kualifikimit për Botërorin 2026, pasi fitoi gjysmëfinalen e plejofit ndaj Sllovakisë me rezultat 4:3 në Bratislavë më 26 mars, por u mposht më 31 mars nga Turqia në Prishtinë me rezultat 1:0.

Pas miqësoreve të qershorit, “Dardanët” do të nisin në shtator ciklin e ri të ndeshjeve në Ligën e Kombeve. Kosova, nën drejtimin e përzgjedhësit Franco Foda, është promovuar për herë të parë në Ligën B, ku në grup do të përballet me Austrinë, Irlandën dhe Izraelin.

Ndeshjen e parë Kosova do ta luajë më 24 shtator, në shtëpi ndaj Irlandës./Albinfo.ch