50 kilometra kolonë në autostradën Hungari – Austri

Si pasojë e këtyre kontrolleve të rrepta nga policia austriake janë krijuar edhe kolona të gjata deri në 50 kilometra, raportojnë mediet austriake

Pasi gjetjes së 71 refugjatëve të vdekur në një kamion në autostradën A4 në Austri, autoritetet austriake tash e disa ditë po kontrollojnë rigorozisht secilin automjet në autostradën që e lidh Hungarinë me Austrinë.

Gjatë këtyre kontrolleve, policia austriake ka arrestuar disa ngasës të automjeteve të cilët bartnin refugjatë për në Evropë. Një ditë më parë ata liruan 24 emigrantë afganë të moshave 16-17 vjeçarë të cilët u gjetën të mbyllur në pjesën e prapme të një furgoni, ndërkohë drejtuesi i automjetit u arrestua.

Si pasojë e këtyre kontrolleve të rrepta nga policia austriake janë krijuar edhe kolona të gjata deri në 50 kilometra, raportojnë mediet austriake. Prioritet i policisë mbetet lufta kundër trafikantëve të qenieve njerëzore, transmeton “albinfo.ch”.

Sipas këtyre medieve kontrollet do të vazhdojnë edhe gjatë ditëve të ardhshme derisa të zvogëlohet fluksi i madh i refugjatëve të cilët ia kanë mësyrë shteteve perëndimore.

Fluksi i paprecedent i refugjatëve po u jep shumë material partive të cilat janë kundër pranimit të refugjatëve, por në anën tjetër nuk kanë munguar as manifestimet në mbështetje të emigrantëve.

Gjatë ditës së hënë, në Vjenë të Austrisë janë mbledhur rreth 20 mijë njerëz në një tubim pro refugjatëve. Ata marshuan duke mbajtur në duar banderola, ku shkruhej “ Mirësevini refugjatë” dhe “Asnjë qenie njerëzore nuk është e paligjshme”, shkruan orf.at, njofton “albinfo.ch”.

Ndërkohë mësohet se edhe më mijëra refugjatë të tjerë gjenden nëpër qytet hungareze të cilët po presin të gjejnë alternativë për të migruar për në shtetet perëndimore, veçanërisht për në Gjermani.