Gjermani: 22-vjeçari humb jetën pas të shtënave të policisë në Saarbrücken

Ngjarja ndodhi gjatë një ndjekjeje policore pas mesnate, pasi i riu dyshohet se iu shmang një kontrolli dhe tentoi të largohej me automjet.

Një ndjekje policore në qytetin Saarbrücken të Gjermanisë ka përfunduar me pasoja tragjike, pasi një 22-vjeçar është qëlluar nga policia dhe më pas ka ndërruar jetë, transmeton albinfo.ch.

Lajmi është konfirmuar nga zyra e prokurorit publik, e cila ka bërë të ditur për mediat gjermane se i riu u plagos rëndë nga të shtënat e policisë dhe nuk arriti t’u mbijetojë plagëve.

Sipas autoriteteve, 22-vjeçari ishte shoferi i automjetit që po largohej nga policia. Ndjekja ka nisur rreth orës 01:00 të mëngjesit, në zonat Dudweiler dhe Herrensohr, pasi shoferi dyshohet se u largua nga një pikë kontrolli policor.

Në automjet, përveç 22-vjeçarit, ndodheshin edhe dy persona të tjerë, një 23-vjeçar dhe një 19-vjeçar. Raportohet se edhe 19-vjeçari është plagosur nga të shtënat me armë zjarri, ndërsa gjendja e tij nuk është bërë ende e ditur.

Autoritetet gjermane kanë nisur hetimet për të sqaruar rrethanat e plota të incidentit dhe përdorimin e armës nga ana e policisë./Albinfo.ch

---