Kosova, Shqipëria dhe Britania bashkohen për ekonominë kreative

Projekti rajonal për ekonominë kreative lidh Kosovën, Shqipërinë dhe Mbretërinë e Bashkuar

Instituti për Ekonomi të Tregut të Lirë (IETL), në bashkëpunim me British Council, ka organizuar në Prishtinë eventin përmbyllës të projektit rajonal “Bridging Creatives: Partneriteti Kosovë – Shqipëri – Mbretëri e Bashkuar për Rritje Kreative”, duke vënë në fokus rëndësinë e bashkëpunimit ndërkombëtar për zhvillimin e ekonomisë kreative dhe fuqizimin e të rinjve në këtë sektor, përcjell albinfo.ch.

Besa Zogaj Gashi, nga Instituti për Ekonomi të Tregut të Lirë, tha se sektori kreativ në mbarë botën është një nga motorët kryesorë dhe më dinamikë të rritjes ekonomike, inovacionit dhe zhvillimit shoqëror e kulturor.

“Iniciativa Bridging Creatives ka qenë shumë e rëndësishme dhe e pamë si një mundësi për të aplikuar. Si institut që merremi me politika, viteve të fundit kemi mbështetur edhe komunën e Prishtinës në zhvillimin e strategjisë për art dhe kulturë. Po ashtu, kemi ndihmuar pjesërisht edhe Qeverinë e Kosovës në hartimin e strategjisë për industrinë kreative,” shtoi ajo.

Zogaj Gashi, theksoi se studentët shpesh nuk marrin njohuri praktike për prezantimin profesional dhe zhvillimin e aftësive të biznesit. Ajo njoftoi se interesimi për programin ka qenë i lartë që nga faza e parë.

“Studentët tani nuk marrin njohuri se si të prezantojnë më mirë veten, si të bëjnë një CV, si të zhvillojnë aftësi lidershipi, menaxhim projektesh dhe biznes planifikim, njohuri kyçe për të pasur sukses dhe për të fuqizuar sektorin kreativ. Nga 123 aplikantë, 88 janë gra dhe 35 burra, çka tregon rolin e rëndësishëm të barazisë gjinore në industrinë kreative”, tha ajo.

Kryetari i Prishtinës, Përparim Rama, u shpreh se projekti ka krijuar lidhje të rëndësishme mes komuniteteve kreative të Kosovës, Shqipërisë dhe Mbretërisë së Bashkuar.

“Prishtina është një qytet i ri, energjik dhe kreativ. Si komunë, ne jemi të përkushtuar të mbështesim kulturën, bashkëpunimin ndërkombëtar dhe zhvillimin e ekonomisë kreative”, tha ai.

Drejtoresha e Këshillit Britanik për Ballkanin Perëndimor, Clare Sears, nënvizoi mbështetjen e vazhdueshme për zhvillimin e ekonomisë kreative në rajon, duke përmendur projekte të ndryshme që shtrihen nga gaming-u, moda, prodhimi i filmave, animacioni, e deri te artet pamore.

“Ky projekt është jashtëzakonisht praktik, fokusuar te aftësitë reale dhe më pak te teoria. Partneritetet e forta rajonale e bëjnë këtë ndërhyrje një shembull të shkëlqyer për zhvillimin e sektorit kreativ në rajon”, shtoi ajo.

---