Hapet klasa e re e mësimit të gjuhës shqipe në Schwabach

Zgjerimi i mësimit plotësues në gjuhën shqipe vazhdon në Bavari

Në qytetin e Schwabach është hapur klasa më e re e LAPSH-it, duke shënuar një moment të rëndësishëm për komunitetin shqiptar në këtë zonë të Bavarisë, shkruan albinfo.ch.

Klasa do të udhëhiqet nga mësuesja Drita dhe pritet të kontribuojë në rritjen e numrit të nxënësve që ndjekin mësimin plotësues në gjuhën shqipe.

Nga Shkolla Shqipe në Bavari u shprehën falënderime për të gjithë ata që, me bashkëpunimin dhe përkushtimin e tyre, mundësuan hapjen e kësaj klase të re. Në përfundim të takimit inaugurues, nxënësit u pajisën me librat shkollorë, duke nisur kështu zyrtarisht rrugëtimin e tyre në ruajtjen dhe zhvillimin e gjuhës amtare.

Vlen të theksohet se mësimi do të zhvillohet çdo të premte nga ora 14:00 deri në 15:30.

Klasa do të mbahet në ambientet e Luitpold-Grundschule Schwabach (Schillerplatz 1, 91126 Schwabach)./Albinfo.ch

 

---