Promovohet libri “Skënderbeu – Një hero arbëror i Evropës” më 7 shkurt në Hamburg

Shoqata “Trojet e Arbrit” dhe partnerët shqiptarë organizojnë një event historik me Prof. Dr. Oliver Jens Schmitt

Shoqata e Intelektualëve Shqiptarë “Trojet e Arbrit”, e angazhuar prej 21 vitesh për ruajtjen dhe promovimin e historisë shqiptare, do të jetë bashkëorganizatore e promovimit të librit të historianit të njohur Oliver Jens Schmitt, “Skënderbeu – Një hero arbëror i Evropës”, në Hamburg, transmeton albinfo.ch.

Eventi do të mbahet të shtunën, më 7 shkurt 2026, nga ora 15:00, në MARKK – Museum am Rothenbaum, dhe organizohet në bashkëpunim me Konsullatën e Përgjithshme të Republikës së Kosovës në Hamburg, shoqatat vendore DANPE, Misioni Katolik Shqiptar në Hamburg, Klubi Kosova Hamburg, ODA Hamburg dhe Ilira në Elbe, si dhe shtëpinë botuese Dora d’Istria.

Gjatë promovimit, pjesëmarrësit do të kenë mundësinë të dëgjojnë ligjërata mbi historinë e Gjergj Kastriotit – Skënderbeut nga autori i librit, Prof. Dr. Oliver Jens Schmitt, dhe nga botuesi dhe publicisti Enver Robelli. Pas ligjëratave, të ftuarit mund të shkëmbejnë ide dhe impresione me autorin dhe botuesin gjatë një koktej rasti.

Ligjëruesit e ftuar:

• Prof. Dr. Oliver Jens Schmitt – autor

• Enver Robelli – botues dhe publicist

Partnerët e mbështetjes:

• DANPE (Deutsch-Albanisches Netzwerk für Politisches Engagement)

• Misioni Katolik Shqiptar në Hamburg

• Klubi Kosova Hamburg

• ODA Hamburg (Organisation deutsch-albanischer Akademiker e.V.)

• Shoqata “Trojet e Arbrit”

• Ilira në Elbe

Ky promovim është një mundësi e veçantë për të njohur dhe ruajtur trashëgiminë historike shqiptare, duke theksuar rolin e Skënderbeut si mbrojtës i Trojeve të Arbrit dhe qytetërimit evropian – një trashëgimi që sot kërkon të mbahet me kujdes dhe respekt./Albinfo.ch

---