Sa para lejohen të futen në Kosovë pa deklarim?

Kufiri doganor për paratë në Kosovë

Qytetarët që hyjnë në Kosovë lejohen të bartin deri në 10 mijë euro pa obligim deklarimi, ka bërë të ditur drejtori i përgjithshëm i Doganës së Kosovës, Agron Llugaliu. Sipas tij, kjo vlen si për transportin ajror, ashtu edhe për atë tokësor, ndërsa çdo shumë që tejkalon këtë vlerë duhet të deklarohet, në përputhje me legjislacionin në fuqi, përcjell albinfo.ch.

Llugaliu theksoi se Dogana e Kosovës ka realizuar reforma të rëndësishme në vitin e kaluar, duke sjellë një dinamikë të re pune dhe rezultate konkrete në menaxhimin doganor.

Ai shpjegoi se Dogana përdor mekanizma të avancuar për zbulimin e tentimeve për futje të mjeteve monetare apo gjësendeve me vlerë të lartë pa deklarim, duke përmendur si shembull rastin e zbulimit të një ore luksoze të këngëtarit Mozzik në Aeroportin Ndërkombëtar të Prishtinës.

Sipas Llugaliut, rritja e porosive online ka paraqitur sfida shtesë, ndaj Dogana ka zgjeruar kontrollet përmes analizës së riskut, pajisjeve skanuese dhe verifikimeve inteligjente për dërgesat postare dhe ato përmes shërbimeve korriere.

Po ashtu, ai bëri të ditur se Dogana monitoron edhe rrjetet sociale, të cilat shpesh shërbejnë si burim informacioni për parandalimin e veprimtarive ilegale dhe shmangien e obligimeve doganore.

---