Gjermania kritikon strategjinë e re të sigurisë kombëtare të SHBA-së

@unsplash

Zëvendëszëdhënësi i qeverisë gjermane, Sebastian Hille, deklaroi në një konferencë për shtyp se Berlini nuk i pranon komentet që, sipas tij, vënë në shënjestër BE-në dhe vlerat e saj themelore.

“Liritë politike, përfshirë lirinë e shprehjes, janë baza e Bashkimit Evropian. Çdo sulm në këtë drejtim e konsiderojmë më shumë si qëndrim ideologjik sesa si strategji”, u shpreh ai.

Hille theksoi gjithashtu se Gjermania nuk pajtohet me vlerësimin e SHBA-së në lidhje me Rusinë. “Dokumenti amerikan nuk e paraqet Rusinë si kërcënim. Ne nuk jemi dakord me këtë. Ne mbështesim plotësisht analizën e NATO-s, sipas së cilës Rusia përbën rrezik serioz për sigurinë transatlantike”, shtoi ai.

Strategjia e re 33-faqëshe e sigurisë kombëtare të SHBA-së, e publikuar javën e kaluar, ka shkaktuar reagime të ashpra në Evropë. Dokumenti akuzon disa qeveri evropiane për kufizim të lirisë së fjalës, shtypje të opozitës dhe kundërshtim të lëvizjeve të djathta dhe anti-emigracion.

Sipas këtij dokumenti, Evropa po përballet me rënie ekonomike, krizë identiteti dhe rrezik “të zymtë zhdukjeje qytetëruese” brenda dy dekadave të ardhshme. Ai thekson se sfidat kryesore të kontinentit lidhen me politikat e BE-së dhe institucioneve ndërkombëtare, migracionin, censurën ndaj lirisë së shprehjes, tkurrjen demografike dhe dobësimin e vetëbesimit kombëtar.