Shaqiri më në fund mund ta ndërtojë shtëpinë prej 2.8 milionë frangash

Xherdan Shaqiri fiton betejën ligjore, nis ndërtimin e vilës së ëndrrave në Zvicër

Pas më shumë se dy vitesh pritjeje dhe përplasjeve gjyqësore me fqinjët, futbollisti shqiptar me famë botërore, Xherdan Shaqiri, më në fund ka marrë dritën e gjelbër për të ndërtuar shtëpinë e tij luksoze në Rheinfelden, në kantonin Aargau të Zvicrës, përcjell albinfo.ch.

Në gusht të vitit 2022, Shaqiri kishte siguruar lejen për ndërtimin e një vile me vlerë prej 2,8 milionë frangash, por projekti hasi në kundërshtime nga disa banorë të zonës. Ata pretendonin se ndërtimi dhe ndriçimi i shtëpisë do të shqetësonte qetësinë e lagjes.

Pas këtyre ankesave, Gjykata Administrative e Aargaut ndërhyri dhe në janar të vitit 2024 e anuloi lejen e ndërtimit. Rasti shkoi më pas në Gjykatën Supreme Federale, e cila vendosi që çështja të kthehej për rishqyrtim në shkallë të parë.

Tani, pas vlerësimit të ri, Gjykata Administrative ka miratuar përfundimisht projektin, duke i lejuar Shaqirit të fillojë ndërtimin e vilës, megjithëse me disa kushte. Një prej tyre është vendosja e perdeve në dritaret e shtëpisë, për të penguar shpërndarjen e dritës së madhe që mund të shqetësojë banorët përreth.

Në anën tjetër, fqinjët e yllit të kombëtares zvicerane mund të ngushëllohen vetëm me këtë “fitore të vogël formale”, sepse në thelb ata kanë humbur betejën kryesore. Gjykata i ka detyruar të paguajnë edhe shpenzimet gjyqësore dhe kompensimet ligjore, në total mbi 18 mijë franga zvicerane:

7.777 franga për gjykatën,

6.600 franga për Shaqirin,

dhe 4.125 franga për qytetin Rheinfelden.

Me këtë vendim, Shaqiri mund të realizojë më në fund projektin e tij personal, një shtëpi moderne dhe luksoze, që pritet të jetë një nga rezidencat më të veçanta në zonën e tij të lindjes.

---