Në Stokholm, Lea Ypi sjell rrëfimin e ri mbi lirinë dhe identitetin shqiptar

Lea Ypi prezanton librin “Të poshtëruar” në Stokholm

Në Qendrën e Kulturës në Stokholm, në prani të një audience të gjerë lexuesish, autorja e njohur shqiptare Lea Ypi zhvilloi një bashkëbisedim të veçantë me publikun rreth librit të saj më të ri, “Të poshtëruar”, transmeton albinfo.ch.

Gjatë këtij takimi, Ypi ndau me të pranishmit rrëfimet, përvojat dhe prapaskenat që e kanë frymëzuar për krijimin e kësaj vepre, ashtu si dhe të librit të saj të suksesshëm “Të lirë”, që ka fituar vlerësime ndërkombëtare.

Në aktivitet morën pjesë Ambasadorja e Kosovës në Suedi, Shkendije Geci-Sherifi, si dhe i Ngarkuari me Punë i Ambasadës së Shqipërisë, Eno Çollaku, të cilët zhvilluan një bisedë miqësore me autoren.

Ata vlerësuan kontributin e Ypit në letërsinë bashkëkohore shqiptare dhe mënyrën se si ajo, përmes veprave të saj, trajton tema të thella që lidhen me identitetin, lirinë dhe përgjegjësinë historike, duke reflektuar mbi përvojën personale dhe kolektive të shqiptarëve.

Ky aktivitet letrar në kryeqytetin suedez u prit me interes të veçantë nga lexuesit, duke dëshmuar ndikimin e vazhdueshëm të veprës së Lea Ypit në debatet kulturore e intelektuale brenda dhe jashtë botës shqiptare. /Albinfo.ch

---