Yll Gashi, supertalenti i Bayernit, Kosova dhe Shqipëria në garë për të

Bild raporton se ai tashmë ka shënuar mbi 100 gola për Bayernin U15 dhe U16

Bëhet fjalë për Yll Gashin, një nga emrat më të përfolur aktualisht në futbollin gjerman të të rinjve, shkruan albinfo.ch. Për talentin kosovar ka raportuar edhe gazeta gjermane Bild, duke e cilësuar si një nga sulmuesit më premtues të gjeneratës së re, transmeton albinfo.ch.

Sulmuesi 17-vjeçar ka kaluar gjashtë vjet në Berlin, duke luajtur për Reinickendorfer Füchse dhe Hertha Berlin, përpara se të transferohej te Bayern Munich në shtator të vitit 2022 – në moshën vetëm 14-vjeçare.

Transferimi i tij u realizua për 90 mijë euro, ndërsa që atëherë Gashi ka bërë hapa të mëdhenj në zhvillimin e tij profesional.

Në radhët e kampionëve të Gjermanisë, ai është shndërruar në një “makinë golash”. Vetëm në tre vitet e fundit, ka shënuar 39 gola dhe ka dhënë 13 asistime në 54 ndeshje me ekipet U17 dhe U19 të Bayernit.

Në total, që nga kategoria U15, Gashi numëron mbi 100 gola të shënuar për klubin bavarez, përfshirë ndeshjet miqësore, ndërsa së fundmi është ftuar edhe në stërvitjet me ekipin e parë.

Pas një ndërhyrjeje kirurgjikale në muajin maj, ai është rikthyer në formë të plotë që nga shtatori dhe ka rifituar vendin e titullarit.

⸻

Kosova dhe Shqipëria në garë për ta bindur

Sipas Bild, përzgjedhësi i Kombëtares së Kosovës, Franco Foda, ka udhëtuar në Mynih për t’u takuar me Gashin dhe familjen e tij, me qëllim për ta bindur që t’i bashkohet përfaqësueses së Kosovës.

Foda e sheh 17-vjeçarin si një lojtar që mund të bëjë menjëherë diferencën në repartin ofensiv, falë shpejtësisë, teknikës dhe instinktit të tij për gol.

Në garë është futur edhe Shqipëria. Presidenti i FSHF-së, Armand Duka, raportohet se ka zhvilluar bisedime me familjen e lojtarit në Mynih për ta përfshirë në projektin e kuqezinjve.

Aktualisht, të dy federatat janë në kontakt të vazhdueshëm me sulmuesin, i cili ende nuk ka marrë një vendim përfundimtar për kombëtaren që do të përfaqësojë. Vendimi i tij pritet të jetë vendimtar jo vetëm për karrierën personale, por edhe për përfaqësuesen që do të fitojë një talent me potencial të jashtëzakonshëm ofensiv. /Albinfo.ch.

---