OVL e UÇK-së organizon protestë në Tiranë më 17 tetor

Organizata e Veteranëve të Luftës së Ushtrisë Çlirimtare të Kosovës ka njoftuar sot se protesta e radhës në mbështetje të ish-krerëve të UÇK-së do të mbahet në Tiranë.

Kryetari i organizatës, Hysni Gucati bëri të ditur se kjo protestë në kryeqytetin e Shqipërisë, vjen pas protestave në Prishtinë dhe Hagë.

“Pas protestës së mbajtur në Prishtinë dhe në Hagë, protestën e radhës ta organizojmë në Tiranë. Arsyet janë të qarta dhe të njohura për opinionin publik, padrejtësia që po ushtrohet në Gjykatën special ndaj ish-krerëve të UÇK-së”, tha ai, transmeton albinfo.ch.

Gucati shprehu mirënjohje për qeverinë shqiptare për kujdesin dhe përkrahjen e vazhdueshme ndaj kësaj çështje madhore e kombëtare.= ndërsa njoftoi se protesta paqësore do të mbahet më 17 tetor në orën 17:00, derisa u bëri thirrje të gjithë shqiptarëve kudo që janë që të bashkohen në këtë protestë për të ngritur zërin ndaj padrejtësive të Gjykatës Speciale.

“Le të ngrihemi të gjithë si një zë i vetëm për të kërkuar drejtësi për çlirimtarët tanë dhe për t’iu kundërvënë padrejtësisë. Ju mirëpresim të gjithëve në Tiranë”, tha Gucati.