Gjermani: Merz mbledh gjigantët e biznesit për të nxitur investimet dhe rimëkëmbjen ekonomike

Kancelari gjerman Friedrich Merz do të takohet sot me drejtues të lartë nga rreth 30 kompani të mëdha gjermane, përfshirë Siemens dhe Deutsche Bank, në një përpjekje për të rikthyer besimin e investitorëve dhe për të ringjallur ekonominë në vështirësi. Takimi, i cili zhvillohet në Berlin, synon të nxisë investimet private në vend pas dy vitesh recesioni dhe një perspektive të zymtë për vitin 2025, shkruan DW, transmeton albinfo.ch.

Në qendër të diskutimeve do të jetë iniciativa “Made for Germany”, një nismë e përbashkët e Siemens dhe Deutsche Bank, që synon të përmirësojë klimën e investimeve dhe të krijojë kushte më të favorshme për zhvillim të qëndrueshëm ekonomik. Kompanitë pjesëmarrëse pritet të prezantojnë projektet e tyre të ardhshme dhe të sinjalizojnë gatishmërinë për të angazhuar kapital të ri në tregun vendas.

“Pjesëmarrja e sektorit privat është thelbësore,” tha një zëdhënës i qeverisë javën e kaluar, duke përmendur gjithashtu fondin e miratuar rishtas për infrastrukturë dhe klimë në vlerë prej 500 miliardë eurosh, si një mjet kryesor për të shtyrë përpara investimet publike.

Qeveria Merz, që mori detyrën në maj, ka miratuar tashmë disa paketa lehtësimi tatimor me vlerë miliarda euro, si pjesë e strategjisë për të nxitur rritjen ekonomike dhe për të tërhequr investime vendase.

Gjermania, dikur shtylla e rritjes së Evropës, është përballur me sfida serioze gjatë viteve të fundit, përfshirë inflacionin e lartë, rritjen e kostove të energjisë, dhe konkurrencën gjithnjë e më të ashpër globale – sfida të theksuara më tej nga pasojat e pandemisë dhe luftës në Ukrainë, transmeton albinfo.ch.