Gjermani: Mërgimtari keqtrajton 17 vjeçaren nga Kosova

Shkoi për ta vizituar të fejuarin në Gjermani, u përball me dhunë e keqtrajtim – 17 vjeçarja e denoncon rastin

Mediat e Kosovës raportojnë për një rast të rëndë të dhunës në familje që është raportuar në Policinë e Kosovës nga një e re nga fshati Shalë, e cila ka denoncuar të fejuarin për dhunë dhe keqtrajtim që dyshohet të ketë ndodhur në Gjermani, përcjell albinfo.ch.

Thuhet se viktima K.SH., 17-vjeçare është paraqitur më 30 qershor 2025, rreth orës 14:30, në Stacionin Policor, ku ka deklaruar se gjatë dy vizitave që kishte bërë tek i fejuari F.S., 18-vjeçar në Gjermani, kishte përjetuar dhunë psikike dhe fizike.

Referuar deklaratës së saj, dhuna kishte nisur në muajin mars, kur kishte shkuar për herë të parë tek i fejuari, ndërsa përshkallëzimi kishte ndodhur më 19 maj, kur ishte keqtrajtuar fizikisht gjatë qëndrimit të dytë në shtëpinë e tij.

E mitura ka pranuar trajtim mjekësor pas kthimit në Kosovë, ndërsa me urdhër të Prokurorit Kujdestar për të Mitur, është iniciuar rasti penal për veprën “Dhunë në familje”, dhe hetimet janë në zhvillim.

Meqenëse i dyshuari nuk gjendet në Kosovë, autoritetet kanë urdhëruar që të ndërmerren veprimet e nevojshme për sigurimin e pranisë së tij dhe për ta intervistuar lidhur me akuzat.

Sinjali do t’ju mbajë të informuar me detaje të reja për këtë rast.

---