Rritja e çmimeve të vezëve në Evropë: Turqia e para, Shqipëria e pesta

Në krye të listës qëndron Turqia, me një rritje të çmimeve të qumështit, djathit dhe vezëve prej 38.6%

Shqipëria u rendit e pesta në mesin e 41 vendeve të Evropës për rritjen e madhe të çmimeve të qumështit, djathit dhe vezëve më 2024, sipas të dhënave të reja të Eurostat, të azhurnuara këto ditë për ndryshimet vjetore të çmimeve në Evropë.

Në krye të listës qëndron Turqia, me një rritje të çmimeve të qumështit, djathit dhe vezëve prej 38.6%.

Turqia, tre vitet e fundit, po përjeton një hiperinflacion që vjen i kombinuar nga problemet strukturore të ekonomisë turke dhe politikës monetare, raporton Monitor, transmeton albinfo.ch.

Pas saj vijnë Malta me rritje 6.7%, Norvegjia me 5.9% dhe Islanda 4%. Shqipëria ndjek këtë renditje me një rritje prej 3.9%, duke e tejkaluar ndjeshëm mesataren e BE-së dhe të rajonit.

Islanda dhe Malta janë vende ishullore me kapacitete të ulëta prodhimi dhe kosto të larta të transportit, teksa Shqipëria nuk është e krahasueshme me këto vende.

Rritjet më të lehta të bulmetrave dhe vezëve u vunë re në vende si Portugalia me 1.8%, Maqedonia e Veriut me 1.8%, Serbia me 1.5% dhe Mali i Zi me 1.1%. Ndonëse presionet inflacioniste po zbuten në shumë ekonomi evropiane, Shqipëria ende përballet me sfida që e bëjnë tregun e ushqimeve ndër më të shtrenjtët në Evropë.

Ndërkohë, shumë vende të Bashkimit Evropian kanë përjetuar ulje të çmimeve për këtë grup produktesh, veçanërisht Çekia me -6%, Hungaria -4.4%, Finlanda -2.4% dhe Gjermania -1.7%.

Zona euro në tërësi ka shënuar një rënie mesatare vjetore prej -0.4% deri në -0.5% të çmimeve të bulmetit dhe vezëve më 2024, duke reflektuar stabilizim ose lehtësim të presionit të çmimeve, pas rritjeve të ndjeshme në vitet e mëparshme, pas pandemisë dhe luftës në Ukrainë.

Rritja me 3.9% e çmimeve për produktet bazë në vendin tonë, si qumështi, djathi dhe vezët, është pasojë e kostove të larta të prodhimit dhe importit, si dhe mungesës së subvencioneve të qëndrueshme për bujqësinë.

Numri i kafshëve në ferma është përgjysmuar dekadën e fundit, duke ulur ofertën në treg, teksa nga ana tjetër, ardhja e turistëve ka rritur kërkesën për bulmet dhe vezë në muaj të caktuar, duke ndikuar më tej në rritjen e çmimeve.

Në një kohë kur vendet e BE-së po përfitojnë nga stabilizimi i tregjeve dhe reduktimi i çmimeve bazë, Shqipëria vijon të përjetojë rritje që ndikon drejtpërdrejt në kostot e jetesës, veçanërisht për shtresat në nevojë.

Me një popullsi në plakje, me ulje të popullsisë në fshat, me mungesë të theksuar të subvencioneve për bujqësinë dhe me kontrolle joeficiente në zinxhirin e furnizimit, Shqipëria rrezikon të vijojë trendin rritës të çmimeve edhe në të ardhmen.

---