Udhëheqësit shqiptarë dhe prijësit fetarë bëjnë homazhe për Papën në Vatikan

Foto: Bajram Begaj, FB

Udhëheqës të komuniteteve fetare nga Shqipëria dhe Kosova i janë bashkuar presidentëve Bajram Begaj e Vjosa Osmani në një delegacion të përbashkët për të bërë homazhe në nderim të Papa Françeskut në Vatikan.

Presidentja e Kosovës, Vjosa Osmani, përmes një postimi në Facebook njoftoi se, bashkë me presidentin e Shqipërisë, Bajram Begaj, dhe kardinalin e vetëm shqiptar, Ernest Simonin, kanë bërë homazhe në Bazilikën “Shën Pjetri”, një ditë para ceremonisë së varrimit të Papës, transmeton albinfo.ch.

“Sot, në Bazilikën ‘Shën Pjetri’ në Vatikan, së bashku me Presidentin Begaj, kardinalin e vetëm shqiptar, Ernest Simonin, dhe delegacionet tona, bëmë homazhe për Shenjtërinë e Tij, Papa Françeskun, për të shprehur respektin e qytetarëve tanë ndaj përkushtimit të tij frymëzues për paqe, harmoni dhe dinjitet njerëzor në mbarë botën,” shkroi Osmani.

Presidenti Begaj publikoi gjithashtu fotografi nga vizita, në të cilat shihen edhe përfaqësuesit kryesorë të komuniteteve fetare në Shqipëri. “Bashkë, për të nderuar Papa Françeskun. Nderojmë kujtimin e Shenjtërisë së Tij, që na la një trashëgimi shpirtërore dhe morale për ruajtjen e dinjitetit njerëzor dhe për të realizuar vizionin e tij për drejtësi, solidaritet e paqe,” shkroi ai, transmeton albinfo.ch.