Në mbarë botën, një grua vritet nga një i afërm çdo 10 minuta

Të paktën 85,000 gra dhe vajza u vranë qëllimisht në gjithë botën në vitin 2023, shumica prej tyre nga të afërmit, sipas shifrave të publikuara të hënën nga OKB-ja, “një nivel alarmant” për vrasjet që megjithatë mund të “parandaloheshin”.

“Shtëpia mbetet vendi më i rrezikshëm” për gratë, ku 60% e tyre kanë qenë viktima të “bashkëshortit të tyre ose anëtarëve të tjerë të familjes së tyre”, thekson ky raport nga Zyra e Kombeve të Bashkuara në Vjenë për Drogën dhe Krimin (UNODC) dhe organizata e Nju-Jorkut UN Women, botuar me rastin e Ditës Ndërkombëtare për Eliminimin e Dhunës ndaj Grave.

Kjo përfaqëson 140 femicide çdo ditë ose një grua e vrarë çdo 10 minuta.

Ky fenomen i kapërcen kufijtë, duke prekur të gjitha kategoritë sociale dhe të gjitha grupmoshat”, ku Karaibet, Amerika Qendrore dhe Afrika janë rajonet më të prekura përpara Azisë.

Në Amerikë dhe Evropë, femicidet kryhen kryesisht nga partneri, ndërsa në pjesën tjetër të botës janë anëtarët e familjes ata që përfshihen më shpesh.

Shumë viktima raportuan dhunë fizike, seksuale ose psikologjike përpara vdekjes së tyre, sipas të dhënave të disponueshme në disa vende. “Kjo sugjeron se shumë vrasje mund të ishin parandaluar”, thekson studimi, për shembull, nga “masat e urdhrit gjyqësor”.

Në rajonet ku mund të krijohet një prirje, shkalla e femicideve ka ngecur ose ka rënë vetëm pak që nga viti 2010, duke treguar se kjo formë e dhunës “i ka rrënjët në praktika dhe norma” dhe është e vështirë për t’u çrrënjosur, vëren UNODC, e cila analizoi shifrat e mbledhura në 107 vende.

Me gjithë përpjekjet e ndërmarra në disa vende, “feminicidet mbeten në një nivel alarmant”, vënë në dukje autorët. Por “nuk është e pashmangshme”, sipas drejtoreshës së UN Women, Sima Bahous, e cila u bën thirrje vendeve të forcojnë arsenalin e tyre legjislativ dhe të mbledhin më mirë të dhëna. /RTS