Ministrat shtrëngojnë duart me popullin e Fribourg-ut

Të mërkurën në mëngjes qeveria zvicerane preferoi Fribourgun për të mbajtur një seancë të zakonshme, mbledhje “jashtë mureve”, ku u takua me pas edhe me popullin e këtij regjioni.

Kjo praktikë e qeverisë zvicerane për të zbritur në terren dhe për të mbajtur mbledhjet e saj jashtë selisë së pallatit federal është në funksion që nga viti 2010. Që nga ai vit është hera e nëntë që Këshilli Federal viziton kantonet e ndryshme duke ju dhënë kështu mundësinë edhe njerëzve të thjeshtë të takohen me ministrat e tyre. Fribourgu pra ishte destinacioni i radhës, i nënti, pas Ticinos, Jura, Uri, Valis, Basel, Schaffhouse, Vaud et Schwyz.

Presidentja e Konfederatës Znj. Sommaruga theksoi se është shumë e kënaqur që ka ardhur në Fribourg i cili është i njohur për dinamicitetin dhe dy-gjuhësinë e tij. Ajo për më shumë ju kujtoi medieve dhe popullit të Fribourgut se ajo ka jetuar 7 vite në këtë kanton ku filloi angazhimin e saj politik, duke vlerësuar gjithashtu edhe koekzistencën kulturore që karakterizon këtë kanton.

Pas mbledhjes së qeverisë dhe seancës së përbashkët me qeverinë kantonale, këshilltaret federal shtrënguan duart me popullin në sheshin përballë bashkisë ku shumë qytetarë patin rastin të bëjnë edhe “selfie” me ministrat. Të gjithë së bashku u drejtuan për të diskutuar më gjatë rreth një aperitivi.

Nëpërmes kësaj praktike, qeveria zviceriane shpreh në mënyre direkte përkushtimin dhe afërsinë me popullsinë duke u njohur edhe në mënyre eksplicite me problematikat e ndryshme lokale.